Vetëdorëzimi i Balilit/ Reagimi, Presidenti Meta falënderon…

Presidenti Ilir Meta duke përshëndetur ndalimin e të shumëkërkuarit, Klement Balili, njohur si “Escobari i Ballkanit” ka falënderuar për këtë ndalim, jo vetëm agjencitë ligjzbatuese, por edhe faktorin ndërkombëtar, që ka bërë sipas tij presion të vazhdueshëm për këtë çështje.

Pyetje: Zoti Meta, a do ta dekretoni kryeministrin si ministër të Jashtëm?

Presidenti Meta: Këtu jemi për të promovuar edhe një herë solidaritetin për dhurimin e gjakut. Për këtë çështje besoj se e kam dhënë një përgjigje dje. Dhe do të jap një përgjigje të qartë, të përgjegjshme, shteruese, me qetësi, por pa dashuri, brenda afateve kushtetuese.

Pyetje: Si e komentoni dorëzimin e Klement Balilit?

Presidenti Meta: E përshëndes ndalimin e Klement Balilit, një person me mjaft probleme me ligjin. Dhe me këtë rast dua të falënderoj jo vetëm agjencitë ligjzbatuese, por edhe partnerët tanë ndërkombëtarë, për presionin e gjithanshëm për të arritur këtë rezultat sot.