Ndjekje penale/ KQZ paralajmëron kryebashkiakët, apel politikës…
Kryetari i Komisionit Qendror të Zgjedhjeve, KQZ, Klement Zguri ka paralajmëruar sot kryetarët e bashkive dhe përgjegjësit e zyrës së gjendjes civile se do të kallëzohen penalisht nëse organizojnë regjistrime fiktive për zgjedhjet e 30 qershorit. Fenomen ky, i cili sipas Zgurit është vërejtur në zgjedhjet e kaluara, lehtësisht është i verifikueshëm dhe do të monitorohet.
“Ndryshimi artificial i vendbanimit përbën shpërdorim të pastër detyre, por ka pasoja të rënda edhe mbi sistemin demokratik, sepse cënon rëndë raportin e zgjedhësve me pushtetin e zgjedhur, si atje ku votojnë zgjedhësit e zhvendosur artificialisht, ashtu dhe atje ku ata fshihen padrejtësisht nga lista. KQZ do të kallëzojë penalisht kryetarët e bashkive dhe përgjegjësit e zyrave të gjendjes civile, kurdoherë që të vihet përballë këtyre fakteve, sapo që ato të konstatohen dhe pa pritur përfundimin e procesit zgjedhor,” tha Klement Zguri ndërsa I bëri thirrje
Edi Ramës dhe Lulzim Bashës që të deklarohen kundër këtij fenomeni.
“Ndaj unë ftoj dhe lidershipin e mazhorancës dhe atë të opozitës të deklarohen publiksht kundër, me qëllim që t’i heqin çdo mbështetje politike fenomenit. Zgjedhjet e datës 30 qershor janë ushtrim shumë i rëndësishëm demokracie, por këtë radhë ato janë më shumë se kaq, janë gur prove për Shqipërinë në procesin e vet të integrimit në Bashkimin Evropian. “
Paralajmërimi i kryetarit të KQZ vjen edhe me konstatimin mnga zgjedhjet e kaluara
“Në proceset e mëparshme zgjedhore jo vetëm vëzhguesit por edhe Komisioni Qendror i Zgjedhjeve ka konstatuar se në disa bashki të vendit është përhapur fenomeni i transferimit artificial të vendbanimit të mbështetësve të atyre që kandidojnë për kryetarë të bashkive, me qëllim ndikimin e paligjshëm mbi rezultatin e votimit, nëpërmjet votave të këtyre votuesve artificialë.”
Ndërkohë edhe për zgjedhësit kishte një apel:”I bëjmë thirrje zgjedhësve që të kontrollojnë emrin në listën elektronike të zgjedhësve të kontrollojnë emrin në faqen zyrtare të interentit të KQZ. Deri në 21 maj 2019 është e hapur mundësia për tiu drejtuar gjendjes civile për të saktësuar të dhënat e tyre,” tha kryetari i KQZ, Klement Zguri duke shtuar se pas kësaj date listat bëhen përfundimtare dhe zgjedhësit që nuk e kanë emrin në listë mund të votojnë vetëm me vendim gjykate.
