Katastrofë humanitare/ Jemen, çdo 10 minuta vdes një fëmijë

Pamje tmerri nga Jemeni po bëjnë xhiron e botës! Lufta po bëhet gjithnjë e më ashpër dhe miliona njerëz po vdesin nga uria dhe sëmundjet e ndryshme.

Rreth 14 milionë njerëz kërcënohen nga uria dhe për 22 milionë është e domosdoshme ndihma humanitare. Në masën më më madhe viktimat janë të rinjtë. Më shumë se 85 mijë fëmijë nën moshën 5-vjeçare kanë vdekur nga uria përgjatë tri viteve të luftës. Në Jemen, sipas të dhënave të UNICEF-it, çdo dhjetë minuta vdes një fëmijë.

Në spitalin El Shaba, spitali më i mirë i fëmijëve në kryeqytetin Sana, në çdo krevat janë nga katër fëmijë.

Në reanimacion ka fëmijë që vuajnë nga mosushqyeshmëria, meningiti, kolera, tuberkulozi dhe pneumonia. Këto sëmundje, në këtë vend ku lufta vazhdon që nga viti 2015, janë vdekjeprurëse sepse nuk ka ilaçe. Nuk ka ushqim.

“Këtu marrin ato që kemi. Qumësht dhe pak ushqim. Çdo fëmijë i cili vjen këtu, të paktën kishte fat. Dhe ka mundësi të shpëtoj,” thekson pediatri Valid Bin Hamam.

Në Jemen janë shkatërruar infrastruktura, rrjeti i ujësjellësit dhe kanalizimit, dhe për shkak të gjendjes në shëndetësi, Kombet e Bashkuara e kanë shpallur këtë vend, njërin prej katastrofave humanitare më të tmerrshme të kohërave moderne.

Jemeni, aktualisht është emri për katastrofën, luftën, varfërinë, urinë dhe sëmundjen. Çmimin më të madh po e paguajnë fëmijët.

Shtatë prej tetë fëmijëve shkon i uritur për të flejtë gjumë ndërsa 400.000 fëmijëve i është kërcënuar jeta. Ata mund të vdesin çdo sekondë. Dhe vdesin…