Protesta e studentëve/ Sot para Kryeministrisë, nesër…
Protesta e Studentëve sot është rikthyer para Kryeministrisë.
Studentët fillimisht kanë marshuar në rrugë për të protestuar më pas para Kryeministrisë dhe Ministrisë së Arsimit, ku kanë gjuajtur godinat e këtyre dy institucioneve me vezë dhe bojë.
“Kjo nuk është dhunë, është çjerrja e fytyrës së një sistemi. Po shprehim pakënaqësinë tonë, kjo formë duhet të ishte djegur nga dita e parë. Protesta e sotme është një marshim nga ministria në drejtim të kryeministrisë. Ne nuk kemi marrë ato për të cilat jemi ngritur,” u shprehën studentët e Fakultetit të Shkencave të Natyrës dhe të Mjekësisë derisa në fakultetet tjera të Tiranës studentët vazhdojnë të bojkotojnë mësimin duke e shoqëruar me ngujim.
Ndërkohë Edi Rama me ministren e re të Arsimit, Besa Shahini vazhdojnë turin e propagandës me “Paktin për Universitetin” si projekt ky i Kryeministrit me të cilin ai vazhdon të jetë i bindur se do të zgjidhet problemi me Arsimin e lartë, problem të cilin e krijoi vetë me Reformën në Arsim.
Nga ana tjetër mediat në shërbim të Kryeministrit vazhdojnë të propagandojnë se mësimi zhvillohet normalisht dhe po vazhdon përafrimin i studentëve me idetë e Kryeministrit, pavarësisht se në të gjitha seancat dëgjimore të “Paktit për Universitetin” me Edi Ramën nuk marrin pjesë studentët por anëtarët e FRESSH-it dhe militantët e Rilindjes.
Ndërsa për nesër studentët kanë ndryshuar itinerarin e protestës, e cila nis në orën 8:30 me mbledhjen para fakulteteve përkatëse, për tu bashkuar të gjithë në orën 10:00 para Parlamentit ku dhe pritet të zhvillohet seanca plenare.
