Protesta në Beograd, kundër Marrëveshjes së Brukselit për Kosovën dhe Vuçiç të jap dorëheqje
Në Beograd për të tetën herë me radhë janë zhvilluar protestat me moton “Njëri prej pesë milionëve” me itinerarin e njejtë nga Fakulteti Filozofik, me një marshim përmes qendrës së qytetit për të përfunduar tek Televizioni Publik i Serbisë, RTS.
Protestuesëve iu drejtua gjykatësi Zoran Ivosheviç dhe profesori Çedomir Çupiç, dhe e veçanta e protestës së kësaj fundjave ishte se përveç dorëheqjes që iu kërkua Presidentit Vuçiç protestuesit kundërshtuan edhe Marrëveshjen e Brukselit për Kosovën duke e konsideruar antikushtetuese.
Zoran Ivosheviç tha se Aleksandar Vuçiç ka shkelur Kushtetutën edhe pse është betuar se do ta rrespektoj, dhe kjo ka sjellë edhe katrahurën në funskionimin e shtetit.
“Kushtetuta ndanë pushtetin legjislativ nga ai ekzekutiv dhe gjyqësor, dhe kjo i takon Parlamentit, Qeverisë dhe Gjykatave. Por Vuçiç merr pjesë në kryerjen e të tri pushteteve,” tha Ivosheviç duke shtuar se është pezulluar sundimi i ligjit, dhe kur nuk ka sundim të ligjit, nuk ka as shtet ligjor.
“Vuçiç ka marrë pjesë edhe në hartimin e Marrëveshjes së Brukselit e cila është antikushtetuese ndërsa ka mëkatuar edhe ndaj pensionistëve kur ju premtoi se ata do të jenë të fundit të cilët do të bartin barrën e stabilizimit financiar në vend, e dolën të parët.”
Më pas fjalën e mori profesor Çedomir Çupiç i cili tha se janë pezulluar katër kushtet kyçe për funksionimin e rendit demokratik: sundimi i ligjit, ndarja e pushteteve, sistemi shumëpartiak dhe sistemi i mediave të lira.
“Në parlament zbatohet dhuna verbale ndaj deputetëve opozitar. Po shkatërrohen organet e pavarura shtetërore siç është Agjencia për luftën kundër Korrupsionit , Avokati i Popullit dhe Komisioneri për informacionet e rëndësisë publike,” tha Çupiç dhe me këtë shkatërrim të institucioneve të pavarura po shkatërrohet edhe shteti.
“Qytetarët dhe opozita së bashku mund ta detyrojnë Vuçiçin që të jap dorëheqje e e protesta, ajo është leksion i demokracisë për të gjithë liderët e ardhshëm.”
Pas fjalimeve që u zhvilluan, protesta vazhdoi me marshimin deri tek Televizioni publik i Serbisë, RTS, në portën e të cilit vendosën shirita në të cilat shkruante “e censuruar” ndërsa ishin kombinuar sigla e RTS me atë të televizionit privat Pink.
Ndryshe, në të njejtën kohë janë zhvilluar protesta edhe në qytetet, Prokuple, Kralevë, Kragujevc, Krushevc dhe Pozhegë.
Protesta e parë është zhvillua me moton “Stop këmishave të përgjakshme” pas sulmit ndaj liderit të së majtës së Serbisë, Borko Stefanoviç më 23 nëntor. Qeverisë dhe Presidentit i parashtruar tri kërkesa: të zbulohen urdhëruesit e vrasjes së Oliver Ivanoviçit, kush ka tentuar ta vras Borko Stefanoviçin dhe poashtu gazetarin Milan Jovanoviç.
