Paralajmërim për Edi Ramën/ PDIU, Idrizi: Larg duart nga Çamëria!

Kryetari i Partisë për Drejtësi, Integrim dhe Unitet, PDIU, Shpëtim Idrizi, duke vënë në dukje sot në Tiranë se si i janë vjedhur votat kësaj partie nga mazhoranca në zgjedhjet e fundit parlamentare, ai paralajmëroi Edi Ramën që të mbajë larg duart nga Çamëria sepse boll e kanë duruar:

“Ne kërkojmë atdheun tonë dhe nuk kërkojmë pronat. Ne jo vetëm kemi marrë mandatin e Tiranës dhe Fierit, por u rrit me 35% në këto zgjedhje. Votat  u vodhën nga kjo mazhorancë. Por ne jemi të gjallë dhe jemi në këmbë, pavarësisht se nuk kemi përfaqësim politik,” tha Shpëtim Idrizi duke shtuar:

“Ne sot nuk jemi në parlament, por do jemi më të fortë për t’u dëgjuar zëri i shqiptarëve. I bëj thirrje Edi Ramës, larg duart nga PDIU dhe nga Çamëria se boll të kemi duruar deri më sot!”.

“Ne sot kemi një rezolutë për shqiptarët e Çamërisë. Do luftojmë çdo ditë për dinjitetin njerëzor. Fqinji jonë vlon sot nga racizmi dhe nacionalizmi për shqiptarët. Shteti shqiptar ka detyrim t’i adresohet NATO dhe të hapë atje çështjen çame, por nuk ka këllqe e dinjitet përballë Greqisë,” tha Shpëtim Idrizi duke folur para strukturave të partisë në Tiranë, ku theksoi se PDIU është një nga partitë e vetme në Shqipëri që e di pse ekziston dhe ka një mision të qartë: “Ne sot kemi një varrezë për shqiptarët e Çamërisë. Ligji për minoritetet është poshtërues për shqiptarët. Kemi qenë dhe jemi për bashkim kombëtar për të afruar shqiptarët e Shqipërisë me Kosovën.”