“Shqipëri pa kanabis”, Ambasadorja e SHBA: Nuk është fitore…

Pasi u mburrën me shifrat e arritjeve, si Ministri Lleshaj ashtu edhe Drejtori Veliu, partnerët e Shqipërisë, SHBA dhe BE u shprehën qartë në aktivitetin e organizuar nga qeveria shqiptare “Për një Shqipëri pa kanabis”, se ka ende punë për t’u bërë për të luftuar krimin.

Pas publikimit të rezultateve në luftën kundër kanabisit, E ngarkuara me Punë e Ambasadës Amerikane në Tiranë, Leyla Moses-Ones, renditi hapat që duhet ndërmarrë qeveria shqiptare sepse të fitosh një betejë nuk është fitore e gjithë luftës.

“Duhen vendosur pengesa të tjera që trafikantët mos ta shohin Shqipërinë si vend lejimi, kapja e Kelment Balilit, Arbër Çekaj duhet të shërbejnë si gurë themeli për këtë përpjekje të gjatë. Tashmë është në dorën e prokurorëve, gjykatave dhe vullnetit politik. Ne nuk e duam këtë më shumë se ju, SHBA janë me ju, por ne varemi nga vullneti juaj politik dhe guximi për të vijuar luftën. Ne jemi me ju që politika mos ta mbështesë këtë aktivitet të paligjshëm.”

Diplomatja amerikane Moses-Ones tha se pas arrestimeve duhet konfiskuar pasuritë si dhe të luftohet pastrimi i parave:

“Trafiku i drogës prodhon para të pista dhe këto furnizojnë krimin e organizuar, gangsterët të cilët më pas mund ta dobësojnë pushtetin. Shqipëria duhet t’i luftojë, arrestimet duhet të pasohen me konfiskim të pasurive të kriminelëve. Sulmimi i pastrimit të parave të përfituara nga trafikimi i lëndëve narkotike është hapi tjetër në këtë luftë.”