Durrës, mjekët në protestë: Duam mbrojtje me policë!

Pas dhunës së ushtruar ndaj kolegut të tyre Gerald Koka dy ditë më parë, sot mjekët e Spitalit të Durrrësit kanë protestuar duke kërkuar mbrojtje 24 orë me polici.

“Kërkojmë të rriten masat e sigurisë në spital dhe në shërbimin e urgjencës. Do të donim të ishte e pranishme policia e shtetit 24 orë, të paktën në shërbimin e urgjencës, në mënyrë që edhe ne ta kryejmë detyrën e qetë ndaj pacientëve.”

Këtë masë të sigurisë mjekët e arsyetojnë me faktin se dhuna çdo ditë është prezent enë ambientet e urgjencës:

“Kërkojmë të sigurohemi, të mbrohemi sepse po ushtrohet dhunë çdo ditë nga qytetarët kundrejt mjekëve. Mjeku është aset dhe duhet mbrojtur. Ju bëjmë thirrje që të mbrohemi sepse as në kohë lufte bluzat e bardha nuk preken. Ne jemi për shërbim dhe jo për tu dhunuar,” theksuan mjekët gjatë protestës.

Ndryshe, mjeku Gerald Koka u godit nga dy pacientë të cilët u përfshinë në një konflikt në urgjencën e spitalit të Durrësit dhe mjeku i turnit u përpoq ti ndajë, dhe njëri prej tyre e goditi me tullë në fytyrë. Mjeku është jashtë rrezikut për jetën.