Parlamenti miratoi Ligjin dhe Platformën për Dialogun
Platforma për dialogun mbi marrëveshjen përfundimtare, gjithëpërfshirëse dhe ligjërisht të detyrueshme për normalizimin e marrëdhënieve mes Kosovës dhe Serbisë u miratua nga Parlamenti i Kosovës.
Parlamenti i Kosovës, pasi ka mbyllur seancën e jashtëzakonshme, në seancën e re ka miratuar në leximin e dytë Projektligjin për detyrat, përgjegjësitë dhe kompetencat e Delegacionit shtetëror të Republikës së Kosovës në procesin e dialogut me Republikën e Serbisë. Ky ligj u miratua me 58 vota për dhe tri abstenime.
Në tentimin e pare për votim në seancën e re, Platforma për dialogun mbi marrëveshjen përfundimtare, gjithëpërfshirëse dhe ligjërisht të detyrueshme për normalizimin e marrëdhënieve mes Kosovës dhe Serbisë, nuk mori votat e mjaftueshme, por në votimin e dytë ajo mori 61 vota për.
Tre deputetët e Partisë Socialdemokrate, fillimisht nuk votuan për Platformën pasi që ata kërkuan që fillimisht të ketë 61 vota për, nga koalicioni dhe më pas ata do të japin vota e tyre.
Deputeti Dardan Molliqaj tha fillimisht se pa 61 vota për, të koalicionit Platforma nuk mund të jetë e pranueshme.
“Nëse platforma nuk i ka 61 vota për, PSD-ja nuk e voton. Pra, partnerët e tjerë që janë pjesë e delegacionit duhet të sigurohen që i kemi të gjitha votat për platformën. Një platformë që nuk i ka 61 vota, për ne nuk është e pranueshme”, tha Molliqaj.
Megjithatë, me votat e deputetëve nga Partia Socialdemokrate, Dardan Molliqaj, Aida Derguti dhe Shqipe Pantin, platforma u miratuar.
Seanca e jashtëzakonshme ishte mbyllur pa hedhur fare në votim projektligjin për detyrat, përgjegjësitë dhe kompetencat e Delegacionit shtetëror të Republikës së Kosovës në procesin e dialogut me Republikën e Serbisë dhe platformës për bisedimet.
Reagon Beogradi: Fundi i Dialogut
Pasj miratimit të platformës për dialogun nga ana e Parlamentit të Kosovës ka reaguar Beogradi zyrtar.
Drejtori i Zyrës për Kosovën prane Qeverise se Serbise, Marko Gjuriq tha se përmes miratimit të këtij dokumenti, Prishtina dërgoi një mesazh se ky është fundi i dialogut.
“Duke adoptuar një platformë që thotë se rezultati i vetëm i mundshëm i dialogut është njohja, pa trajtuar të drejtat dhe pozitën e serbëve, tregon se Prishtina në këtë mënyrë ka dërguar një mesazh se ky është fundi i dialogut”, tha Gjuriq në një konferencë për media sonte në Beograd.
Sipas tij, vendimi i autoriteteve të Prishtinës e ka vënë Serbinë në pozitën më të keqe që nga viti 2011. Ai theksoi se presidenti i Serbisë Aleksandar Vuçiq për nesër ka ftuar takimin urgjent të Këshillit për siguri nacionale.
“Ne nuk do të ngutemi, por Serbia do të jetë në gjendje të mbrojë interesat kombëtare dhe shtetërore sa i përket çështjes së Kosovës, pozitës dhe të drejtave të serbëve në Kosovë dhe në të gjithë Serbinë”, tha ai, duke shtuar se për vendimet e mëtejshme mediat do të njoftohen nesër.
