Seanca plenare/ Taulant Balla pa kundërshtar në Parlament. Merret me…

Seanca plenare filloi me lajmin e mirë për “Opozitën e Edi Ramës” nga kryetari i Grupit Parlamentar të PS dhe të gjitha grupeve tjera parlamentare, Taulant Balla, duke i bërë me dije këtyre shërbëtorëve parlamentar të kryeministrit se ju takojnë posti i Nënkryetarit të Parlamentit, kryetari i Komisionit të Mediave dhe Arsimit, Kryetari i Komisionit të Integrimit Europian dhe Komisioni i Shëndetësisë dhe Çështjeve Sociale.

Gjithashtu ata do të jenë pjesë edhe e delegacioneve parlamentare që përfaqësojnë Shqipërinë në institucionet ndërkombëtare.

 “Ju jeni deputetët tërësisht legjitim në funksionin tuaj. I bëj thirrje të dyja grupeve të konturuara tashmë, ju lutem bëni propozimet për të marrë të gjitha pozicionet që i takojnë opozitës. Tre kryetarët e komisioneve, nënkryetarin e Parlamentit dhe të gjitha delegacionet e tjera, të cilat me të drejtë i takojnë opozitës. Punë të mbarë në këtë ushtrim demokratik të punës së Parlamentit”.

Dhe ndërsa deputetët e “Opozitës së Edi Ramës” ranë në delir dhe filluan të flasin për meritat e tyre për rinisjen e Reformës Zgjedhore, Taulant Balla u bëri me dije se janë jashtëzakoisht të parëndësishëm dhe se Partia Socialiste do të vazhdoj te merret me Partinë Demokratike.

“Se kur do të zhvillohen zgjedhjet nuk e përcakton as PS as çka mbetur nga PD por kushtetuta. Argumentet e nxjerra nga opozita nuk qëndron asnjëra, as bojkot e as dorëzim mandatesh.”

Duke mos u bindur as nga prezenca e një deputeti të Bindjes Demokratike, Taulant Balla, vazhdoi me broçkullat e tij për zgjedhjet:

“Çdo natë të fushatës së 2017 kisha një bisedë më Edmond Spaho që më tregonte sesi LSI vidhte dhe blinte vota në Elbasan. Nuk kam sesi mos ta them. Si ka mundësi që zgjedhjet e 2017 janë vjedhur dhe opozita ta denonconte 2 vite më pas, duke mos lënë asnjë proces verbal. Si mund të vidheshin ato zgjedhje kur për herë të parë mbarëvajtja u bë nga PD,” u shpreh Taulant Balla, i cili çuditërisht u shqetësua sot për investitorët e huaj por jo edhe kur i merrnin me dru eksponentët e PS:

“Basha dhe Kryemadhi kanë vendosur të bllokojnë sot të gjitha akset më të rëndësishme kombëtare, pro një gjë është e sigurt, nuk mund të bllokojnë dot reformën në drejtësi. Nuk mund të bllokojnë sot miratimin e këtij ligji sikurse nuk kanë mundur prej 2016 të bllokojnë paketën, ndryshimet kushtetuese dhe ligjin për vetingun.

Në vazhdën e këtyre protestave të dhunshme që dëmtojnë ekonominë, turizmin, konsumin. Ishim para pak minutash në Rinas teksa u hodh themeli i një prej hoteleve më të rëndësishme me 5 yje në Shqipëri. Një kompani gjermane, ka vendosur të investojë përsëri në Shqipëri.

Përfaqësuesi i kësaj kompanie gjermane teksa mori fjalën tha erdha nga Mynihu me një avion të mbushur me turistë gjermanë. E turistëve gjermanë sot teksa shkojnë për në Vlorë do ti dalë përpara Luli dhe Monika për tu zënë rrugën për të mos shijuar bukuritë e turizmit shqiptar.

E teksa një gjerman do të pyesë gjermanin tjetër se çfarë hall kanë këta, po ju themi nga këtu:

Halli i tyre është reforma në drejtësi. Prandaj bllokojnë rrugët. Të bllokosh rrugët sot do të thotë është të mundohesh të pengosh sado pak. Por nuk kanë për t’ia arritur.

Ky është halli i biznesit të kunatit, nuk është halli i  biznesit të një qytetari të ndershëm që punon për të mbajtur familjen.

Përballë kësaj vale dhune dhe përpjekje për të penguar shqiptarët të lëvizin nëpër rrugët e Shqipërisë, përgjigjja është vetëm një. Dëgjoje Lulzim:

Ke gjithë të drejtën të protestosh kur të duash, sa herë të duash, por harroje të nxisësh dhunë, të kryesh akte vandalizmi, të godasësh policinë, institucionet, të terrorizosh njerëzit se ke për tu përballur me ligjin, qoftë ti, qoftë kushdo tjetër që tenton të bllokojë rrugë, të dhunojë institucione, të vandalizojë biznese private,” tha kryetari i Grupit Parlamentar të PS dhe të gjitha grupeve tjera parlamentare, Taulant Balla, i cili vazhdon të mbetet i pashqetësuar për mungesën e Gjykatës Kushtetuese si hallkën e fundit dhe të domosdoshme që një binzes mund ta mbrojë pronën e tij nga bandat kriminale që janë shumë më shumë në numër se sa bizneset, e ku përfshihen edhe ato huaja; Që shpresën e vetme vazhdojnë ta mbajnë te Gjykata e Strasburgut dhe jo ajo e Edi Ramës.