Tiranë, Sot nis Samiti i liderëve të Procesit të Brdo – Brijuni. Vuçiç pritet me protesta…

Sot në Tiranë nis punimet Samiti dyditor i radhës së Liderëve të Procesit Brdo-Brijuni.

“Me ftesën edhe të Presidentes së Kroacisë, Kolinda Grabar-Kitarović dhe të Presidentit të Sllovenisë, Borut Pahor, në Samitin e Tiranës, do të marrin pjesë tre Anëtarët e Kryesisë së Presidencës së Bosnje-Hercegovinës, Milorad Dodik, Shefik Xhaferoviç dhe Zhelko Komshiç, Presidenti i Kosovës, Hashim Thaçi, Presidenti i Malit të Zi, Milo Gjukanović, Presidenti i Maqedonisë, Gjorgje Ivanov, si dhe Presidenti i Serbisë, Aleksandar Vuçiç,” thuhet në njoftimin e Presidencën së Shqipërisë si organizatore e radhës, ku të ftuar nderi janë Presidenti i Polonisë, Andrzej Duda, dhe Përfaqësuesja e Lartë për Politikë të Jashtme dhe Sigurisë pranë BE, Federica Mogherini.

Në mbyllje të Samitit, nesër më 09 Maj, Liderët e procesit do të miratojnë një dokument me konkluzionet e takimit.

Për shkak të prezencës në këtë Samit të dy liderëve serb, përgjegjës për krime lufte, Aleksandar Vuçiç dhe Milorad Dodik, Qendra Lëvizja Vetëvendosje në Tiranë sot ka ftuar qytetarët në orën 18:00 që të protestojnë përpara bustit të vëllezërve Frashëri.

Ndryshe, Procesi i Brdo-Brijunit është një nismë rajonale bashkëthemeluar nga Presidentët slloven dhe kroat në vitin 2010.