Mesazhi i fundit për Edi Ramën, Basha: Largohu, koha për zgjidhje politike!

Në mbyllje të protestës së opozitës, Kryetari i Partisë Demokratike, Lulzim Basha kishte një mesazh për aleatët ndërkombëtar dhe një mesazh të fundit për Kryeministrin Edi Rama. Opozita tha si është e gatshme të sakrifikojë gjithçka dhe është koha për zgjidhje politike, largimin e Edi Ramës, qeveri tranzitore dhe zgjedhje të lira dhe të ndershme..

“Mesazhi i sotëm është i qartë dhe i prerë ndaj miqve dhe aleatëve tanë dhe ndaj kundërshtarëve dhe armiqve të demokracisë se ne jemi gati të sakrifikojmë gjithçka për votën e lirë. Nuk do ta lejojmë kurrë despotizmin antievropian, të cilët kanë kapur drejtësinë dhe kanë bllokuar rrugëtimin tonë drejt Evropës.

Sot japim këtë mesazh të qartë dhe të vendosur. Këtë betejë e nisëm për Shqipërinë si gjithë Evropa dhe tani është koha për zgjidhjen politike, largimin e Edi Ramës, qeveri tranzitore dhe zgjedhje të lira dhe të ndershme.”

Pas mbylljes së protestës, Lulzim Basha bëri të ditur se opozita është gati që me gjithë faktorët e përgjegjshëm politik të vendit, të hapim rrugën e zgjidhjes së krizës, duke bërë të mundur së pari largimin e shkaktarit dhe pengmarrësit të demokracisë, të shtetit të së drejtës dhe përmes një qeverie tranzitore garantimin dhe ndarjes së pushteteve, realizimin e zgjedhjeve të lira dhe të ndershme dhe dalje e një qeverie të zgjedhur nga popullit.

“Forca jonë është bashkimi, vendosmëria, qëndresa dhe përballja dhe përballje do të ketë deri në fitore. Sot në këtë mbrëmje të mbushur me shpresë, me mesazhe pozitive të shkrirjes në një të vullneteve tuaja, të vullnetit të popullit shqiptar dhe Evropës për ta çliruar Shqipërinë nga diktatura e krimit. Le të ndahemi me një mesazh të qartë dhe të prerë; se ne jemi gati ta çojmë këtë betejë deri në fund dhe paralajmërimi se kush mendon që me dhunën e krimit dhe paligjshmërisë do ta thyej këtë vendosmëri gabon rënd dhe pret vetëm përmbysje popullore.

Ky bashkim i jashtëzakonshëm ka forcën, vendosmërinë dhe qartësinë për ta çuar këtë betejë deri në fund. Ne nuk do ta pranojmë dhunën e krimit të organizuar në kutitë e votimit. Nuk do pranojmë kurrë më paligjshmërinë e një qeverie të faktuara ilegjitime. Nuk do pranojmë më zgjedhje kriminale të kësaj qeverie ilegjitime dhe këtij kryeministri të kapur në krim. Jemi gati që së bashku me gjithë faktorët e përgjegjshëm politikë të vendit të hapim rrugën e zgjidhjes politike duke bërë të mundur së pari largimin e pengmarrësit dhe përmes një qeverie tranzitore ndarjen e pushteteve, zgjedhje të lira e të ndershme.”

Ky kushtrim është dëgjuar nga miqtë tanë strategjikë, tha Kryetari i Partisë Demokratike, dhe orët dhe ditët në vijim qofshin ditë reflektimi të thellë për ata që mendojnë se mund ta marrin peng këtë popull se mendojnë se mund ta mbajnë peng qeverisjen e këtij vendi. Për ata që iu shkon në mendje se më 30 qershor do iu shtrëngojnë kularin në fyt shqiptarëve dhe do mbysin demokracinë, kjo nuk ka për të ndodhur.

“Sot në këtë mbrëmje të mbushur me shpresë, të mbushur me optimizëm, me mesazh pozitive të shkrirjes në një të vullneteve tuaj, të popullit shqiptar për liri dhe demokraci, vetë vullnetit të Europës dhe miqve tanë për ta çliruar Shqipërinë nga diktatura e krimit, të ndahemi me një mesazh të qartë se ne jemi gati ta çojmë këtë betejë deri në fund po kështu dhe paralajmërimi se kush mendon se do ta thyejë këtë vendosmëri popullore, gabohet rëndë dhe e pret vetëm përmbysja popullore,” tha Kryetari i PD, Lulzim Basha duke përfunduar:

Rama ik, hapi rrugë zgjidhjes politike!

Pas mbylljes së protestës së opozitës, Kryetari i Partisë Demokratike, Lulzim Basha ka kërkuar një mbledhje me Ish-deputetët, kryetarët e degëve dhe kryetarwt e bashkive.