Ilir Meta i Edi Ramës!

nga Agim Popoci

Ka disa ditë që Kryeministri Edi Rama është sforcuar në takimet elektorale për ti bindur delet socialiste se Ilir Meta është i opozitës.

Nuk është i qartë gjithë ky sforcim edhe nëse kemi parasysh Dekretin e Presidentit për ta anuluar datën e zgjedhjeve 30 Qershor, sepse gjatë pluralizmit politik, është Ilir Meta ai i cili i ka dhënë leksione Edi Ramës se si shkatërrohet Partia Demokratike.

Edi Rama si Kryetar i Bashkisë duke dëmtuar Tiranën nuk e ka kuptuar se pse i duhet gjithë ai angazhim Ilir Metës për të shkatërruar Partinë Demokratike, kur të gjitha levat e pushtetit i kishte në dorë! Por sot Edi Rama e kopjon këtë drejtim të politikës kriminale duke shkuar në ekstrem, me arrestimin e qindra pjesëmarrësve të protestës nga PD dhe asnjërin prej tyre nga LSI!

Pikërisht ashtu siç bënte mentori i  tij Ilir Meta! Nëse kemi parasysh Ilir Metën Kryeministër, dhe Ilir Metën ndërsa largohet nga koalicioni qeverisës me PD-në dhe si hyzmeqar i Presidentit të Serbisë, Boris Tadiç, shkon në Shkodër dhe firmos Marrëveshjen e koalicionit qeveris me Edi Ramën, ID-ja e këtij njeriu dhe qëllimet e tij janë të frikshme!

Ilir Meta Kryeministër, në vitin 2001 kishte për qëllim shkrirjen e plotë të Partisë Demokratike dhe instalimin e një mazhorance në parlament përmes “Dushkut”, që nuk do të njihte kufij. Arrestimi i liderit të PD, Sali Berisha, vajtja në familjen e Azem Hajdarit dhe vizita në Tropojë, aty ku shpëtoi vetëm fal ndërhyrjes së demokratëve tropojanë, ishin sinjalet e qarta të pretendimeve të këtij njeriu, i cili nuk doli dot nga lëvozhga e tij komuniste ndonëse krijoi dhe pagëzoi një parti që sikur është socialiste dhe zotohet për integrim.

Ilir Meta përmes të gjitha levave të pushtetit ka përndjek, keqtrajtuar dhe arrestuar vetëm anëtarët e Partisë Demokratike, duke mos harruar mediat, ku gjithmonë ishte jashtëzakonisht i kujdesshëm, dhe SHIK-un e kishte armën e palodhshme në këtë drejtim.

Sot Edi Rama bënë të njejtën gjë me drejtimin e Qeverisë vetëm çalon trajtimi i “armikut” Ilir Meta.

Edi Rama mund të vazhdoj të flas pa lidhje, por Ilir Meta nuk u votua President në kohën e pellazgëve! Elektorati i tij edhe nëse e ka trurin e deleve ashtu siç pretendon Kryetari i PSD, Paskal Milo, ata e kanë të qartë se me Marrëveshjen e Tadiçit,  lideri i tyre Edi Rama u bë Kryeministër në mënyrë që Ilir Meta të zgjedhet President. Dhe, votimi nuk është histori sepse ndodhi në Prillin e vitit 2017, kur u votua me 87 vota dhe PD nuk e votoi, madje nuk ishte fare në seancë;  Dhe, Edi Rama jo vetëm që e zgjodhi President por ditë më parë tha se nuk është penduar sepse të njëjtën gjë do ta bënte përsëri.

Dhe jo vetëm kaq! Të gjitha sukseset politike që ka shënuar Edi Rama deri më sot i ka fal Ilir Metës.

Edi Rama sot krekoset se hoqi kioskat dhe pastroi Lanën si kryetar i Bashkisë së Tiranës, por sikur mos të ishte ndihma e Ilir Metës, kryeministër në atë kohë, Rama nuk do të bënte asgjë nga ato paligjshmëritë që bënte poshtë e lartë nëpër Kryeqytet!

Edi Rama nuk do të fitonte asnjërën nga zgjedhjet lokale, madje as ato kur garonte vetë në Tiranë, sikur mos të ishte Ilir Meta. Ndoshta për të vjedhur vota nuk ishte e nevojshme ndihma për Edi Ramën ama kolonat mbajtëse në Këshillat Bashkiak ishin me njerëzit e Ilir Metës.

Edi Rama nuk do të bëhej kurrë Kryeministër, sikur mos të ishte Ilir Meta. E bëri, heshti gjatë procesit të kanabizimit të vendit, shkatërrimit të institucioneve duke përfshirë këtu edhe institucionin e Presidentit dhe Reformën në Drejtësi; Dhe, sot, Ilir Meta po korrë atë që ka mbjellë me shkronjësin e tij të fjalimeve dhe më pas partnerin e koalicionit, Edi Rama.

Sot, kur Edi Rama e denigroi Dekretin e Presidentit me Kolegjin Zgjedhor, një absurd juridik i padëgjuar ndonjëherë, ai heshtë ashtu siç heshti kur opozita braktisi Parlamentin dhe Rama nuk respektoi afatin 30 ditor për të plotësuar vendet vakante. Reagimi i vetëm që vinte sot nga Presidenca dhe përmes Zëdhënësit ishte se vendimi i Kolegjit Zgjedhor na qenka skeç! Vendimi edhe mund të jetë skeç por reagimi i Presidencës është turp!

Në fund, letra që i shkroi kreut të OSBE-së, ku Ilir Meta pasqyron krizën politike në të cilën ndodhet vendi dhe ngre shqetësimin që Shqipëria po shkon drejt konfliktit civil, për Edi Ramën është britmë e një të lajthituri pa ditur çfarë flet!

Mund të jetë edhe kjo, por është dhe britmë e një të lajthituri i cili tani po e kupton se çfarë ka bërë, kur të kamurin me pushtet në Tiranë, Edi Ramën, e bëri dhe Kryeministër. Dhe nuk e kishte parasysh atë që Blaise Pascal e ka thënë shumë kohë më parë por sot për Ilir Metën e Edi Ramës është vonë:

“Drejtësia pa fuqi është e pamundur, fuqia pa drejtësi është tirani!”