Ndërtimi lulëzon agjencitë e pasurive të paluajtshme, me rritje dyshifrore në 2018-n
Bumi i ndërtimeve në kryeqytet është shoqëruar edhe me rritjen e numrit të bizneseve që operojnë si agjenci të pasurive të paluajtshme. Në 2018-n numri i tyre shënoi 847, me një rritje prej 15% në krahasim me një vit më parë sipas statistikave të INSTAT. Ndërsa sipas Moneyval, e cila vlerëson sektorin patundshmërisë me risk të lartë për sa i përket pastrimit të parave, vetëm 8% e transaksioneve kalojnë nëpërmjet agjencive të pasurive të paluajtshme.
Në fakt numri i ndërmarrjeve që operojnë në pasuritë e paluajtshme ka qenë në rritje të vazhdueshme që prej 2013-s. Prej atëherë numri i tyre është rritur me 86%.
Ecuria e tyre ka qenë në raport të drejtë me ecurinë e lejeve të ndërtimit. Sipas INSTAT, në tremujorin e parë 2019, janë miratuar gjithsej 245 leje ndërtimi për ndërtesa të reja, nga 221 leje të miratuara në tremujorin e parë 2018, duke shënuar rritje prej 10,9%. Sipërfaqja e lejeve të ndërtimit miratuar për ndërtesa të reja, në tremujorin e parë 2019, është rreth 581.236 m², nga rreth 200.944 m², miratuar në tremujorin e parë 2018, duke shënuar rritje me rreth 2,9 herë.
Dy vitet e fundit, lejet e ndërtimit kanë shënuar rritje të dukshme në kryeqytet. Për të gjithë vitin 2018 janë dhënë leje me sipërfaqe prej 940 mijë metra katrorë, nga 521 mijë vitin e mëparshëm, me një rritje prej 80%. Vetëm në tremujorin e katërt janë dhënë leje për një sipërfaqe ndërtimi prej 456 mijë metra katrorësh, ose 70% e sipërfaqes së dhënë gjithsej në vend për leje ndërtimi për këtë periudhë. Ritmi i lartë i tremujorit të katërt 2018 vijoi dhe në janar-mars të këtij viti.
Tirana si qendër ekonomike dhe universitare tërheq vit pas viti banorë të rinj në kryeqytet, të cilët furnizojnë kryesisht kërkesën në tregun e qirasë.
Agjencitë: Po prishet tregu
Disa nga agjencitë kryesore në vend janë të shqetësuar se numri i lartë i agjencive të paluajtshme po ndikon negativisht. Sipas tyre pjesa më e madhe nuk kanë eksperiencë në ofrimin e shërbimeve në patundshmëri dhe në vlerësimin e pronave që listojnë në agjenci. Klajdi Memajdini, menaxher shitjesh në agjencinë DevInf shpjegon se shumë agjenci të reja për të pasuruar databazën vendosin çmime jo reale për të tërhequr klientë. Kjo gjë ka sjellë një ngërç në treg. Pronarët që marrin shërbimet nga këto agjenci nuk janë kanë një informacion të saktë në lidhje me tregun. Kjo ka prekur edhe individët që kërkojnë të blejnë, pasi nuk marrin një informacion të rregull si për pronën që po blejnë ashtu edhe për të gjithë procedurën që shoqëron shit-blerjen. Sipas Memajdinit ofrimi i shërbimit jo korrekt po prish imazhin që kanë individët për agjencitë./Monitor/
