Borxhi publik 63.03%, bie interesi mesatar

Borxhi publik i Shqipërisë ishte sa 63.03 për qind e Prodhimit të Brendshëm bruto në fund të 6 mujorit të parë të këtij viti. Ministria e Financave raportoi se trajektorja rënëse e borxhit ka vijuar edhe në raport me fundin e marsit kur ky tregues ishte sa 63.6 për qind e PBB-së por borxhi rezulton më i ulët pasi llogaritet mbi bazën e PBB vjetore. Gjasat që të kemi një rritje të saj mbeten të hapura deri në fund të vitit, duke u varur drejtpërdrejt nga sjellja e qeverisë për të marrë borxh të ri.

Plani i qeverisë është që në fund të këtij viti borxhi publik të jetë në nivelet 64.9 për qind ndëkrohë që në fund të vitit të shkuar niveli i borxhit publik ishte 67.16 për qind e PBB-se.

I kthyer në vlerë borxhi në fund të 6 mujorit të parë të këtij viti ishte 1.10 trilionë. Pjesa më e madhe e tij rezulton të jetë në monedhën kombëtare me rreth 575 miliardë lekë ndërsa 529 miliardë lekë është ai në monedhë të huaj. Ajo që vihet re në raport me një vit më parë është zgjerimi i huamarrjes në monedhë kombëtare kryesisht përmes instrumenteve të tilla si letrat me vlerë. Qeveria ka siguruar nga kreditorët vendas në total në stokun e saj të borxhit 610 miliardë lekë me një rritje prej 7.1 miliardë lekë më shumë se në fund të vitit të shkuar ndëkrohë që pesha e kreditorëve të huaj në stokun total ka pësuar tkurrje.

Pavarësisht kësaj tendence për të emetuar letra me vlerë duke siguruar borxh nga tregu i brendshëm të dhënat tregojnë se ecuria e yeldit mesatar ka qenë në rënie. Kështu në fund të 2018-ës yeldi mestar ishte 4.18 ndëkrohë që në fund të qershorit ka zbritur në 3.85 që është niveli më i ulët i yeldit mesatar me të cilin është siguruar borxhi ndonjwherw në vend. Nga ana tjetër maturiteti mesatar është rritur nga 840 që ishte në fund të vitit 2018 në 878 ditë në fund të qershorit./Monitor/