Shqipëria vërtetë në krizë, kur Ilir Meta përfaqëson shtetin e së drejtës

Pasi Delegacioni i Komisionit të Venecias bëri të ditur se kishin krijuar idenë për shkeljet e Presidenti të Republikës, Ilir Meta u mundua ti bindë shqiptarët se cili është engjulli në këtë mjedis të kontaminuar politik ndonëse fajtori kryesor është vetëm ai, si për rrëzimin e qeverisē së PD ashtu dhe sjelljen në pushtet të Edi Ramës me ndërmjetësimin e Beogradit.

Sot shqiptarët e kuptuan nga Ilir Meta se jetojnë në dy shtete, atë të së drejtës dhe shtetin e propagandës, dhe që jetojnë në njē vend është në krizë të thellë e konfirmoi vetë Meta kur tha se përfaqëson shtetin e së drejtës.

Presidenti u mundua të shitet i pashqetësuar nga iniciativa e mazhoranës për shkarkimin e tij ndërkohë tha se do të jetë prezent në mbledhjen e Komisionit të Venecias, ku do t’i japë përgjigje çdo lloj pyetje nga anëtarët e Komisionit.

“Dua të falënderoj Kuvendin e Shqipërisë për këtë respekt dhe besim që tregon ndaj Komisionit të Venecias, dhe tju bëj të ditur se bashkëpunimi i Presidentit me këtë Komision do të jetë jashtëzakonisht i shkëlqyer dhe transparent.

Në respekt të punës që ata kanë nisur, deri në 11 tetor u kemi dhënë një raport paraprak, lidhur me disa pyetje që Kuvendi ka drejtuar lidhur me përgjegjësitë e Presidentit.

Këto dokumente do të jenë publike në faqen zyrtare të Presidentit, do të jetë i hapur për kontribute, për tu pasuruar me kritika apo ide, sepse kemi të bëjmë me një çështje shumë të rëndësishme në fushën e të drejtës, që do të studiohet edhe në fushën e marrëdhënieve ndërkombëtare, dhe unë jam përgjegjës.

Sfide që unë e mirëpres dhe sjell një ndërkombëtarizim të një çështje nga Kuvendi i Shqipërisë, por si një President tepër i bindur se është një shërbim i jashtëzakonshëm për demokracinë në nivele evropiane, këtë punë do ta bëj në mënyrën më të mirë të mundshme.

Kam shprehur gatishmërinë për të qenë i hapur në 11 tetor për çështjen në fjalë
11 tetori është datë jo e rëndësishme për Shqipërinë, sepse shqiptarët e dinë që presidenti s’ka  bërë shkelje të kushtetutës, përkundrazi, por kuptohet se çdo përpjekje për të sajuar një datë si fokus propagande, është lëvizje dëshpëruese për të shmangur datën më të rëndësishme, që është 18 tetori. Ndaj ftoj të merreni me 11 tetori, por aq sa duhet, por të merren të gjithë me 18 tetorin.”

Meta tha se shqiptarët jetojnë në dy shtete, atë të së drejtës dhe shtetin e propagandës. Ai mendon se përfaqëson shtetin e parë për shkak të detyrës që i është ngarkuar ndonëse deri më sot kurrë nuk ishte në atë krah:

“Për sa i takon qetësisë para Komisionit unë jam gjithmonë i qetë edhe kur artikuloj me forcë. Të gjitha veprimet e mia janë kryer përpara qytetarëve shqiptarë. Nuk kam pasur asnjë arsye të sillesha ndryshe sepse unë dua të bëj të qartë për qytetarët e Republikës së Shqipërisë do të jem shembulli i respektimit të institucioneve.

Presidenti i Republikës ka respektuar në mënyrë të përgjegjshme Kushtetutën, të gjitha detyrimet ndërkombëtare që janë të detyrueshme për Shqipërinë që nga Konventa Evropiane për të Drejtat e Njeriut, për të vazhduar me marrëveshjen e asocim-stabilizimit apo detyrimet si anëtare e OSBE-së. Dokumenti i Kopenhagën është një dokument kyç. Për të ata që i besojnë të vërtetës është e bardha mbi të zezë. Ju dëgjoni shpesh që jetojmë në dy shtete njëkohësisht, në shtetin e propagandës dhe shtetin e së drejtës.

Unë besoj se përfaqësoj shtetin e së drejtës. Në shtetin e propagandës, thuhet që Presidenti nuk ka të drejtë të zhdekretojë. A ekziston fjala në Kushtetutë? Jo! Unë nuk kam të drejtë të zhdekretoj, kam të drejtë të nxjerrë dekrete. Unë kam të drejtë të nxjerr një dekret për të shfuqizuar dekretin e mëparshëm. Qeveria ka të drejtë të nxjerrë një vendim për të shfuqizuar një vendim të mëparshëm.

Në qoftë se do të bëhesha pjesë e shtetit të propagandës, se nuk mund të bëhem se nuk ma lejon detyra. Mua më vjen keq për juristët se hajt më për deputetët e rinj. Po të fillojnë qytetarët të shkojnë në Gjykatën e Strasburgut për çështje analoge do të na shqepin me gjoba. Boll kemi rastin e Bechetin.”

A ka ndonjë shkelje në gjithë veprimtarinë e Presidentit? Kështu vlerëson Ilir Meta:

“Vetëm në tejkalimin me dy apo tre muaj të afatit me kohë zgjedhore jo në Kushtetutë, tërësisht e parëndësishme në raport me parimet kushtetuese dhe të drejtës për të zgjidhur, dhe të drejtën për të zgjedhur e ka përcaktuar Gjykata e Strasburgut.”

Dhe, Komisioni i Venecias:

“Unë kam vlerësim të madh për këtë Komision, më prestigji në kontinent, për kushtetutën, drejtësinë, të drejtat e njeriut, nuk janë as si politikanë që tjetër thonë sot e tjetër nesër, as si diplomatë që flasin pa përgjegjshmëri, ndaj ka bërë mirë Kuvendi që e ka ftuar.

Një nga arsyet që jemi këtu në këtë situatë, dhe mirë kanë bërë që e thirrën Komisionin e Venecias para se ta thërrisja unë, sepse janë shkelur rekomandimet e Venecias për reformën në drejtësi, prokurorin e përgjithshëm, gjykatën kushtetues, por dhe për aspekte të tjera.”

Në fund, i pyetur nëse i druhet shkarkimit, Meta tha se një pyetje të tillë i druhen ata që kanë frikë të zhvillojnë votime demokratike, sërish duke menduar për kryeministrin Edi Rama.

“Kjo është një pyetje që zakonisht u shkon atyre që kanë frikë nga votimet demokratike, nga dorëheqjet, etj. Dua tu rikofirmoj edhe një herë se do të punojmë bashkë deri më 24 korrik 2022. Deri në atë datë, kuadri i Presidencës është Shqipëri Kuqezi. Nuk ka asnjë shans dhe asnjë mundësi që Presidenti Ilir Meta të dalë nga kjo zyrë deri më 24 korrik 2022. Është betuar, do të mbroj rendin kushtetues, demokracinë dhe të ardhmen evropiane të Shqipërisë në interesin e popullit shqiptar.

Pastaj, për çështje të tjera nuk dua të hyj në detaje. Duke qëndruar në këtë detyrë, shpesh disa prej jush kanë raportuar gjëra jo të vërteta për Presidentin e Republikës. Ilir Meta është këtu për mision historik. Do ta përmbush si një mision historik.”