Prishtinë, Osmani: Qytetarët e dinë mirë kush e ka degraduar shtetin

Kandidate për kryeministër e Lidhjes Demokratike të Kosovës, Vjosa Osmani, u ka bërë thirrje sot qytetarëve të lagjes Dardania në Prishtinë, që t’i besojnë LDK-së, pasi ajo do të sjellë ndryshimin dhe sërish u zotua se LDK nuk bënë më koalicion me PDK-në.

“Detyrë patriotike sot është jo me i tregu muskujt, detyrë patriotike sot është me krijuar një vend pune, detyrë patriotike sot është me ju dhënë shpresë të rinjve, detyrë patriotike sot është nënat mos me pas probleme financiare me rrite fëmijët, sidomos ne vitin e parë.”

Kandidatja e LDK-së për kryeministër të Kosovës, tha se banorët e Prishtinës e dinë më së miri se kush ka keqqeverisur, kush i ka mashtruar dhe kush e ka degraduar shtetin.

“E tash këto vite nga keqqeverisja e aty që po dëshmohen që janë në shërbim të të korruptuarve dhe ka ardhur koha që t’u themi të gjithëve lamtumirë. Atyre që keqqeverisën në nivel qendror, edhe atyre që nuk bënë asgjë për Prishtinën, e nuk po bëjnë asgjë për Prishtinën në nivel lokal,” tha Vjosa Osmani duke përfunduar:

“E mënyra më e mirë për ta bërë ketë është duke bërë ndryshimin historik me 6 tetor.”