Albin Kurti: Vjosa Osmani do të jetë kryeparlamentare, unë kryeministër!

Kandidati për kryeministër i Lëvizjes Vetëvendosje, Albin Kurti tha se LDK ka qenë e interesuar për një koalicion me LVV-në, megjithatë sipas tij kjo ka qenë e pamundur për shkak të frikës që kanë ndaj Partisë Demokratike të Kosovës, gjithsesi është i bindur se Vjosa Osmani do të jetë kryeparlamentare, ndërsa ai kryeministër.

“LDK ka qenë të interesuar por nuk ka qenë të gatshëm, sepse frika ua mundur dëshirën”. Por është evidente që më shumë kanë frikë ndaj PDK-së se sa dëshirë ndaj Lëvizjes Vetëvendosje. Ne do të shohim mëngjesin e 7 tetorit se me çfarë thellësie kemi fituar.”

Albin Kurti ka përmendur tri shtyllat kryesore si parim për zhvillimin e vendit. Shteti i së drejtës, që sipas Kurtit nënkupton, prokurorinë dhe gjyqësorin që janë të pakompromis në luftën kundër korrupsionit.

“Kjo do të bëhet me një reformë të drejtësisë, me vetting. Buxheti për gjyqësorin dhe për ushtrinë është më pak se 5 për qind të buxhetit të gjithëmbarshëm të Kosovës, kjo nuk do të jetë në qeverisjen tonë.”

Shtylla e dytë, tha Kurti, do të jetë shteti zhvillimor.

 “Ne duam të rrisim sektorin privat. Me këto struktura ekonomike që i kemi nuk mund të presim zbutjen e papunësisë. Duhet të kemi më shumë shkolla profesionale, dhe ato të lidhen me tregun e punës.”.

Ndërsa shtylla e tretë, tha Albin Kurti, është shteti social.

“Ne duhet të kemi fokusin tek shëndetësia, jemi shteti i vetëm që nuk kemi sigurime shëndetësore, ne do të përqendrohemi maksimalisht që të bëjmë ndarjen e shërbimit publik dhe privat”, tha ai.

Vendimi i parë si kryeministër, Albin Kurti e bëri të ditur se do jetë zvogëlimi i qeverisë, gjë që sipas tij ka qenë pjesë e ofertës gjatë diskutimeve me Isa Mustafën, në 12 ministri. Ndërsa vendimi i radhës është krijimi i Fondit Sovran.

“Vendim tjetër do të jetë Fondi Sovran dhe banka zhvillimore. AKP mbyllet dhe  zëvendësohet me Fondin Sovran. Dialogu me pakicat është shumë i nevojshëm”, tha ai.

Në fund, Albin Kurti e bërti të qartë se një administratë e tepërt nuk nevojitet ndërsa u shpreh i bindur se ai do të jetë Kryeministër i ardhshëm i Kosovës, ndërsa Vjosa Osmani kryetare e Parlamentit.

“Vjosa Osmani do të jetë kryeparlamentare, unë do të jem kryeministër. Duhet të fillojmë dialogun tonë të brendshëm për parimet dhe strategjinë tonë, dhe dialogun me Brukselin për dialogun me Serbinë.”