Fakemediat Rama-Meta!

nga Agim Popoci

Njërit ndër përfituesve më të mëdhenj të fakenews-ve në Shqipëri, Edi Ramës, i ra kokës një fakenews i prodhuar nga media e rivalit të tij Ilir Meta, në garën e egër për pushtet edhe kur toka shqiptare është e goditur nga tërmetet, dhe njerëzit janë të traumatizuar nga një tërmet i fuqishëm, si ai i 21 shtatorit.

Ndonëse shqiptarët kanë pësuar dëme edhe më të mëdha nga fakemediat e Ilir Metës dhe Edi Ramës që nga viti 2000, mbrëmja e së dielës së 22 Shtatorit tregoi se shqiptarët edhe kur nuk vidhen, edhe kur nuk largohen nga puna, edhe kur nuk detyrohen të largohen nga vendi, janë të rrezikuar nga kjo dyshe e kobshme që sot janë Hajduti dhe Polici, Prokurori dhe Gjykatësi, Vrasësi dhe Kanuni, Mazhoranca dhe Opozita, dhe së fundi Tërmeti dhe Zoti! 

Dhe, asgjë këtu nuk është rastësi!

Kur Ilir Meta ishte Kryeministër dhe shkronjësi i tij i fjalimeve, Edi Rama, Kryetar i Bashkisë së Tiranës, fakemediat e tyre ndihmuan këtë pushtet kriminal që të vidhet floriri dhe të mos reagoj njeri, të vriten njerëz nëpër gurore dhe të dënohen gazetarët, të mbyllet Ambasada e Kosovës me urdhër të Beogradi dhe me miratimin e qeverisë shqiptare dhe të akuzohet UNMIK-u, të shembet gjithçka dhe të ndërtohet në Tiranë ashtu siç e kishte menduar shkronjësi, të vidhen votat nga Kryeministri dhe gjithçka të relativizohet me rrezikun më të madh që i kanosej këtij vendi, Sali Berisha që ishte në opozitë!

Fakemediat Rama-Meta mundësuan edhe ndryshimin e kupolës kriminale të PS me njerëz shumë më kriminal, që në emër të reformës e më vonë edhe rilindjes të promovohen si e ardhmja e këtij vendi.

Ishin po këto fakemedia që pasqyruan edhe numrin dy të Qeverisë që numëron 700 mijë euro që i kishte marrë ryshfet, dhe po këto fakemedia që nxitën një revoltë popullore në emër të këtij krimi që u publikua me zë dhe figurë. Ndonëse u krijua përshtypja se kjo revoltë popullore ishte një reagim qytetar dhe u arsytuan, dy vjet më pas fakemediat e kësaj dysheje kriminale promovuan Marrëveshjen e arritur me urdhër nga Beogradi, që Rama-Meta të rrëzojnë Sali Berishën nga pushteti dhe ta çojnë vendin drejtë BE.

Ardhja e Ilir Metës dhe Edi Ramës në pushtet ishte dita më e zezë e këtij vendi, që si e tillë nuk pasqyrohej nga fakemediat e tyre që tashmë zotëronin kontrollin e plotë ndaj opinionit publik kundër një opozite që nuk kontrollon dot në tërësi jo një gazetar por as Zyrin e shtypit të partisë.

Shumë vjedhje, shumë lekë dhe klientë të shtuar bënë që kjo dyshe të pësoj një çarje e cila detyrimisht u reflektua edhe në fakemediat e tyre. Sot vërtetë kemi mediat e Edi Ramës dhe mediat Ilir Metës, por ashtu sikur se në vitin 2000 kemi një dyshe që për qëllim ka pushtetin dhe asgjë tjetër, dhe kjo u dëshmua me fakenews-in që lançoi fakemedia e Metës, dhe mënyrën se si reagoi fakemedia e Ramës edhe në momentet më të vështira që po kalonin shqiptarët pas tërmetit të fuqishëm të 21 Shtatorit.

Kur ra tërmeti me magnitudë 5.8 të shkallës Rihter, në fakemediat e Metës dominoi lajmi me parashikimin që kishte bërë Ilir Meta duke ju referuar sizmiologut grek Akis Tselentis, dhe i cili jo vetëm që ishte shpërfillur nga Edi Rama, por sejmenët e tij e kishin degjeneruar Presidentin e Republikës që bëri thirrje për kujdes.

Sizmiologu grek, që sipas Metës kishte parashikuar një tërmet apokaliptik, pasi ra ai me magnitudë 5.8 sqaroi se paralajmërimi i tij ishte bërë për krerët shtetëror dhe jo për mediat që ta publikojnë, në mënyrë që të merren masat. Por Tselentis as që e kishte menduar se kemi të bëjmë me një dyshe shtetërore kriminale e cila sikur kur vriten 4 vetë në bulevard, sikur kur ka përmbytje, dhe tashmë që ka tërmete, rivalit nuk i falin as momentin e fundit në mënyrë që të përfitojnë nga ardhja në pushtet.

Kështu dhe ndodhi mbrëmjen e 22 Shtatorit. Kryeministri Edi Rama nuk reagoi pas fakenews-it që dhanë mediat e Ilir Metës se nuk do të ketë mësim të hënën dhe të martën, ndonëse kishin kaluar vetëm 3-4 minuta që Ministrja e Arsimit, Besa Shahini bëri të ditur se të hënën nuk do të ketë mësim për shkak të situatës së krijuar pas tërmetit të fuqishëm të  21 Shtatorit. Me shpresën se do të krijohet një situatë kaotike të martën, dhe nxënësit nuk do të shkojnë në shkollë pas lajmit të dhënë nga fakemediat e Ilir Metës, Kryeministri Edi Rama heshti dhe bëri gati artilerinë e tij mediatike për të akuzuar Presidentin me fakemediat e tij!

Por, në këto momente, Kryeministri Edi Rama nuk mendoi se fakenews-i pasardhës që ishte bërë gati nga fakemediat e Ilir Metës do të përshpejtojë krijimin e një kaosi dhe nuk do të goditet kolltuku i Presidentit, por ai i Kryeministrit që do të përballet me daljen masive të qytetarëve në rrugë. Fakemediat e Ilir Metës raportuan paralajmërimin e sizmiologut grek, Akis Tselentis se pritet në orën 23:30 do të bie një tërmet shumë i fuqishëm me magnitudë 6 të shkallës Rihter. Reagimi i Edi Ramës ndaj këtij fakenews ishte po aq kriminal sa lajmi i transmetuar në fakemediat e Ilir Metës. 

Pasi u sqarua fakenews-i i lançuar nga ekspertët sizmiolog shqiptarë që hodhën poshtë mundësinë e paralajmërimit të një tërmeti, dhe iu bë thirrje qytetarëve të Tiranës dhe Durrësit që të kthehen në shtëpitë e braktisura, Edi Rama ndërseu Ish-Gjeneral Sandër Lleshajn për ti vënë prangat autorit të fakenews. Qershia mbi këtë tortë të prishur tregon se cili është edhe qëllimi i fakemdiave Rama-Meta, dhe pse i duhet Kryeministrit një media kritike me patjetër.

Një lajm ose fakenews qoftë ai, i shkruar nga një gazetar, kalon të paktën në dy filtra, redaktor dhe kryeredaktor, e në realitetin shqiptar me patjetër edhe te pronari i medias. Por, policët e Ish-Gjeneralit me pranga në duar kapën gazetarin, personin me përgjegjësinë më të vogël që kishte në publikimin e lajmit dhe krijoi kaosin ndër qytetarë, dhe nga ana tjetër nxori Ministren Gjaçka që tregonte se burgu e pret autorin e këtij fakenews-i. Sikur Edi Rama të ishte në kërkim të fajtorit, ai do të përfundonte në pranga jo vetëm duke u bazuar nga statusi që publikoi në profilin e tij në Facebook por edhe nga lajmet e ngjashme që iu referuan sizmiologut grek, si dhe nga intervista e sizmiologut grek, Akis Tselentis, ku askund nuk përmendet as një tërmet me magnitudë 6 të shkallës Rihter as edhe ora 23:30. Por ai ndaloi sepse ishte i ndërgjegjshëm që fakemediat e rivalit të tij i kanë gati  predhat e radhës që dëmtojnë vetëm karrigen e Kryeministrit, e sa për popullin shqiptarë, si ai ashtu dhe Meta e dinë që çudinë e mbajnë mend vetëm 3 ditë!

Në fund, akuzat dhe kundërakuzat e fakemediave Rama-Meta nuk janë leksion i mirë vetëm për ata që ranë në kurthin e një tërmeti të parashikuar dhe kaluan natën në rrugë, por edhe për gazetarët e rinj që të kërcënuar nga buka e gojës pranojnë edhe shkrime me autorësinë e tyre të shkruar nga pronari i mediave dhe jo vetëm.

Sot në Shqipëri ka dy lloj gazetarësh, jo për nga rroga që marrin por nga standardi në të cilin jetojnë. Si hyzmeqarë të fakemediave Rama-Meta mund të përzgjedhin nëse duan të jetojnë në vilat me komshi Samir Manen ose operatorin dhe faqosësin me të cilin të cilin punojnë, por viktimë tjetër e fakenews-it që cenon postin e Ilir Metës ose Edi Ramës nuk ka, është vetëm gazetari dhe prangat i ka të varura mbi kokë.

Por, sot, situata nuk është e pashpresë për gazetarët. Ata dhe vetëm ata mund mund  ti konvertojnë fakemediat Rama-Meta në gjyle me barut të lagur! Shumë e thjeshtë: Duke mos pranuar të jenë autor i një fakenews! Kjo minon dhe pasqyrimin e një Edi Rame dhe Ilir Mete, siç e duan ata, pasqyrim i cili nuk i sjell më vota kësaj dyshe kriminale që sot janë Hajduti dhe Polici, Prokurori dhe Gjykatësi, Vrasësi dhe Kanuni, Mazhoranca dhe Opozita, dhe së fundi Tërmeti dhe Zoti!