Pezullohet mësimi në Durrës, Tiranë dhe Lezhë. Mësuesit nesër…

Shkollat e Durrësit do të jenë të mbyllura deri më datë 9 dhjetor, ndërsa në Tiranë dhe Lezhë, procesi mësimor do të nisë më datë 5 dhjetor. Këtë e ka bërë të ditur sot ministrja e Arsimit, Besa Shahini, duke shtuar se nëse ambientet nuk do të jenë të jenë të përshtatshme për nxënësit, atëherë afati mund të shtyhet.

“Sot me propozimin tim mori këtë vendim, në qarkun e Durrësit, Durrës, Krujë, Shijak deri në 9 dhjetor pezullohet mësimi. Në qarqet Tiranë, Vorë, Kamëz Kavajë, Rrogozhinë, në qarkun e Lezhës, Kurbin, Mirditë deri në datë 5 dhjetor por ruajmë mundësinë që ta shtyjmë edhe për disa ditë të tjera nëse nuk jemi të sigurt që janë në gjendje të duhur. Do e bëjmë njoftimin me datën 4 dhjetor,” thekson Besa Shahini ndërsa për shkollat tjera ajo saktëson:

“Mësimi fillon normalisht në të gjitha qarqet e tjera. Në qarkun e Elbasanit në dy shkolla ka relativisht të vogël të nxënësve dhe do transportohen në shkollat e afërta dhe do rifillojnë mësimin.

Kjo vlen edhe për shkollat private. Kopshtet dhe çerdhet në Tiranë e Lezhë do kenë fleksibilitet, ato që janë të sigurta edhe mund të rihapen. Në Durrës nuk rifillojnë deri në datën 9 dhjetor.”

Për mësuesit, ministrja e Arsimit tha se duhet të kthehen në punë të hënën e 2 dhjetorit, për të nisur përgatitjet për planin mësimor.

“Ky vendim për rifillimin e mësimit vlen vetëm për nxënësit. Mësuesit i presim në punë duke filluar nga nesër, me një fleksibilitet me mësuesit e qarkut të Durrësit që ndoshta jo të gjithë mund të paraqiten në shkolla. Në shkollat që po riparohen mësuesit do takohen në një shkollë tjetër të afërt.

Drejtorët e shkollave të marrin informacion nga bashkitë respektive të marrin informacion nëse shkolla mund ti hapë dyert nesër për takimin e mësuesve dhe të planifikojë takimin në shkollën më të afërt. Kjo është e domosdoshme të bëhet për përgatitjen e rifillimit të mësimit. Paraqitja e mësuesve në shkollë nesër nuk është opsionale dhe zyrat vendore arsimore monitorojnë gjithë procesin e këtyre takimeve që do bëjnë mësuesit në shkollat respektive.”

Në qarqet tjera, tha Besa Shahini, mësimi do të vijojë normalisht, ndërsa theksoi se qeveria ka marrë masa për transportin dhe shëndetin psikologjik të nxënësve të prekur nga tërmeti.

“Ministria e Arsimit mbrëmë ka finalizuar planin e zhvendosjes së nxënëseve nga shkollat që janë shumë të dëmtuara, të cilat nuk do hapen as pas një periudhe shkollore në shkollat pritëse. Është e nevojshme për të ditur që kur të fillojë mësimi ku shkollë do të shkojnë nxënësit. Kemi bërë kalkulimet e kostove të kësaj zhvendosje dhe jemi në proces të organizmit të mjeteve transportuese që do të bëjnë këtë lëvizje.

Kjo përfshin edhe nxënësit që janë të strehuar përkohësisht nëpër hotele. Ata nxënës besoj se do të ndryshojnë shkollën dhe duhet ti transportojnë në shkollat më të afërta. Pasdite do të kenë edhe një shërbim tjetër arsimor nëpër vendstrehimet e përkohshme ku ndihmohen me detyrat e shtëpisë dhe mësimin për të nesërmen,” tha ministrja e Arsimit, Besa Shahini duke shtuar se strehimet e përkohshme nuk janë vetëm në hotele por ka edhe në çadra nxënës, por që kjo pjesa e çadrave do mbyllen shumë shpjet dhe besoj shumë shpejt do i kemi të gjithë nxënësit në kushte të përshtatshme për të marrë mësim dhe organizuar të gjitha aktivitetet e tjera.