Kosova dështon sërish në PISA, të tretët nga fundi në testin e vitit 2018

Kosova nuk ka pasur rezultate të mira në vlerësimin ndërkombëtar të nxënësve i njohur si PISA 2018.

Kosova është renditur e treta nga fundi në garën ku morën pjesë 79 shtete duke lënë mbrapa vetëm Republikën Dominikane dhe Filipinet ndërsa Shqipëria, në Ballkan, sipas këtij rezultati është më e mirë vetëm se Bosnje Hercegovina.

Ministri i Arsimit, Shyqiri Bytyqi pasi u publikuan rezultatet e testit “PISA 2018” tha se rezultatet nuk janë ato që kanë pritur por nuk duhet fajësuar individë, duhet të gjenden shkaqet e vërteta që quan në këtë rezultat. Është arsyetuar se pas marrjes së detyrës si ministër kanë pasur vetëm 3 muaj afat për përgatitjen e këtij testi.

“Kemi disa arritje pozitive ne matematikë dhe lexim. Kemi rënie tek shkenca. Cilat janë arsyet e këtyre rezultateve na duhet kohë të analizohen raportet e secilit nxënës pjesëmarrës dhe raportet e shkollave,” tha ai duke shtuar se nëse Qeveria e ardhshme e merr seriozisht këtë test, do të shënohen rezultate më të mira.

Ndërkohë Fatmir Elezi nga divizioni për vlerësim, standarde dhe monitorim në MASHT duke prezantuar rezultatet e PISA-s tha se në vitin 2018 këtij testi i janë nënshtruar 5.058 nxënës nga 211 shkolla të Kosovës.

“Në lexim jemi të 4 nga fundi. Në matematikë të 5 nga fundi, në shkencë jemi të 4 nga fundi. Rezultatet më të ulëta kanë qenë në shkencë. Gjimnazet kanë performuar më mirë. Vajzat kanë performuar shumë më mire se djemtë në gjuhë, edhe në shkencë,” tha Elezi.

Ndryshe, sipas rezultateve që maten me indeksin e mesatares së OECD, nxënësit kosovarë kanë arritur 353 pikë në lexim, 366 në matematikë dhe 365 në shkencë.

Kujtojmë që edhe në vitin 2015 Kosova mori të njëjtin rezultat.