Paketa Antishpifje/ Protesta, gazetarët në mbrojtje të fjalës së lirë!
Ndonëse Edi Rama dje paralajmëroi se Paketa Antishpifje do të miratohet në parlament përkundër kundërshtive si nga komuniteti i gazetarëve ashtu dhe Brukseli zyrtarë, gazetarët ashtu siç paralajmëuan organizuan një protestë kundër kësaj pakete ligjore që i jep fund fjalës së lirë dhe i jep kontrollin e plotë Qeverisë dhe Kryeministrit Edi Rama.
Jo për ti treguar BE dhe SHBA-së se çfarë po bënë Edi Rama me ligjet dhe popullin, por për ti bërë të qartë Kryeministrit Edi Rama se këtë paketë ligjore nuk e pranojnë pavarësisht se çfarë bënë ai me pronarët e mediave, AMA-n dhe AKEP-in .
Drejtuesi i Unionit të Gazetarëve në Shqipëri, Aleksandër Çipa i cili iu është bashkuar kolegëve të tij në protestën kundër paketës antishpifje përpara Parlamentit tha se ky draft e bën AMA-n një agjenci censuruese dhe shpërfill të gjitha mundësitë dhe kapacitetet vetërregulluese që ka në mjedisin mediatik shqiptar.
“Nuk bëhet fjalë për pika kryesore, behet fjalë për një draft që përfshin dy projektligje që marrin përsipër të rregullojnë të ashtuquajturën realitet të shpifjes në mjedisin mediatik shqiptar dhe që i atribuohen dy enteve më të rëndësishme AMA dhe AKEP.
Mënyra sesi është konceptuar dhe ristrukturuar ky draft është gabuar metodologjikisht sepse vetë mënyra sesi do funksionojë AMA nëpërmjet bordit të saj dhe përmes këshillit të ankesave nuk ka asgjë më shumë sesa brendinë e funksionimit të një agjencie censure. Kjo shpërfill të gjitha mundësitë dhe kapacitetet vetërregulluese që ka në mjedisin mediatik shqiptar brenda entitetit të gazetarëve dhe editorëve shqiptarë.”
Penalitetet e parashikuara të paketës antishpifje për editorët e mediave online, Çipa tha se janë të papërballueshme financiarisht ndërsa rikujtoi se masa e marrë nga AMA, sipas këtij drafti, hyn në fuqi direkt pa një vendim gjykate.
“Mënyra sesi do funksionohet mes AMA- dhe AKEP, masat dhe penalitetet e parashikuara. Këto penalitete në masën financiare janë drastike dhe të përballueshme nga editorët e online. Shumica e online janë në pronësi dhe administrim të gazetarëve dhe kapacitetet e astet financiare të tyre janë të pamjaftueshme për të përballur këto penalitete.
Ka një aspekt tjetër të cungimit të të drejtave dhe lirisë së shprehjes. Mënyra sesi do merret masa penalizuese nga Këshilli i ankesave dhe miratuar nga bordi i AMA-s dhe kalimi menjëherë në masë preventivit përmes përmbarimit pa pritur një vendim të gjykatës.”
Gjithsesi, Drejtuesi i Unionit të Gazetarëve në Shqipëri, Aleksandër Çipa, tha se do konsumojnë të gjithë mundësitë për ndalimin e futjes në fuqi të paketës antishpije.
“Ne do konsumojmë të gjitha mundësitë tona, do i drejtohemi Presidenti për të mos e dekretuar draftin dhe jemi në solidaritet me organizmat kombëtare.”
