“Gylenistin” që e dorëzoi Kosova, Turqia e dënon 8 vjet burg

Gjykata e Lartë Penale numër 36 në Stamboll, ka dënuar me 8 vjet e 1 muaj burg, Kahraman Demirezin, “gylenistin” i cili ishte deportuar nga Kosova në marsin e vitit 2018.

Sipas mediave turke, Demirez është dënuar për pjesëmarrje në një grup të organizuar terrorist. Një akuzë të tillë megjithatë e ka mohuar Demirez, shkruan Anadolu Agency.

Prokuroria e Stambollit, gjithashtu, kishte kërkuar që Demirez të dënohet edhe për spiunim ndërkombëtar, megjithatë në seancën e mbajtur dje ai është liruar nga një akuzë e tillë.

Ndryshe, Kahraman Demirez ishte një prej 6 personave të cilët u arrestuan nga shteti i Kosovës dhe u deportuan përmes Aeroportit të Prishtinës në bashkëpunim me inteligjencën shtetërore turke.

Pas këtij deportimi dhe mënyrës se si u deportuan 6 shtetasit turq ka dhënë dorëheqje ministri i Punëve të Brendshme, Flamur Sefaj, dhe shefi i Agjencisë Kosovare të Inteligjencës, Driton Gashi.