Maqedoni e Veriut, Qeveria teknike e mbajti mbledhjen e parë
Me Oliver Spasovskin dhe dy ministrat nga radhët e VMRO-DPMNE-së, Naqe Çulev, ministër i Brendshëm dhe Rashela Mizrahi ministre e Punës dhe Politikës Sociale, Qeveria teknike e Maqedonisë së veriut sot mbajti mbledhjen e parë. Me këtë rast u emëruan Zv/kryeministrat në kabinetin e Spasovskit, Sheqerinska, Osmani dhe Duraku, ndërsa në vend të Koço Angjushevit që u tërhoq nga posti, vjen Mila Carovska. Me hyrjen e VMRO-DPMNE-së në Qeveri, opozita tregoi hipokrizinë dhe patriotizmin e saj të rrejshëm, akuzoi partia në pushtet.
“Kandidatët për ministra nga radhët e VMRO-së në Qeverinë kalimtare, nuk e kishin problem të nënshkruajnë dhe të japin deklarata si ministra të Maqedonisë së Veriut, duke deklaruar se do e respektojnë Kushtetutën dhe ligjet e Republikës së Maqedonisë së Veriut. E pranuan edhe kryetarin e Paelamentit, Talat Xaferin, për të cilin thoshin se nuk e njohin si kryetar. Seanca e djeshme është dëshmi se VMRO-DPMNE lufton thjeshtë për pushtet duke treguar patriotizëm të rrejshëm dhe hipokrizi,” tha Hari Lokvenec i LSDM.
Mickovski u kërcënua se do publikojë, sipas tij, indikacione serioze për keqpërdorime nga ditët e fundit të qeverisjes së Zoran Zaevit. Nga ministrat e VMRO-së në Qeverinë teknike pret të punojnë vetëm sipas ligjit.
“Nëse mendoni se ne do ta injorojmë këtë realitet, atëherë do ishim hipokritë, siç e bëjnë këtë shkruesit e LSDM-së kohëve të fundit, ku deri dje kishin gojën plot me parashtresën e re, ndërsa sot në faqet e tyre në Facebook kanë vetëm Maqedoni. Kjo është hipokrizi. Nuk është hipokrizi kjo që e bëjmë ne, ku përpiqemi më shumë mund ta mposhtim këtë sistem të kalbur,” tha Kryetari i VMRO-DPMNE, Hristijan Mickovski.
Dje dy ministra nga radhët e opozitës nuk u paraqitën në takimin me Presidentin e Republikës Pendarovski. Mickovski thotë se nuk është praktikë që ministrat të shkojnë tek presidenti pas emërimit të tyre dhe tha se ata janë të përkushtuar në kompletimin e kabineteve të tyre. Qeveria teknike ka mandat 100 ditë dhe duhet të bëjë organizimin e zgjedhjeve të 12 prillit. Lideri opozitarë nuk lë hapësirë për shtyrjen e zgjedhjeve, edhe pse ankohet se partia e tij në zgjedhje futet me pasuri të ngrirë./Alsat/
