Dollari shënon rekord të ri, aksionet në bursa vlera historike

Në tregun valutor botëror dollari ka shënuar gjatë javës rritjen më të madhe në dy vitet e fundit, gjë që theksohet se ka ndodhur për shkak forcimit në vazhdim të ekonomisë amerikane. Në bursat amerikane vlerat e aksioneve janë rritur fuqishëm duke arritur nivelin më të madh në histori.

Kështu, indeksi i dollarit, që tregon vlerën amerikane ndaj gjashtë valutave tjera më të forta në botë, është rritur për 1.5 për qind, në 98.68 pikë, nivel ky më i larti për katër muaj. Me këtë rast euro ndal dollarit ka pësuar rënie për 1.4 për qind, në 1.0945 dollar, që është dhe rënia më e madhe e valutës europiane nga nëntorit i vitit të kaluar.

Ndaj valutës japoneze, vlera e dollarit është rritur për 1.2 për qind, në 109.75 jen.

Muaji Janar, punësohen 225 mijë persona

Rritja më e madhe e dollarit e shënuar në dy vitet e fundit, që ka tejkaluar edhe parashikimet makroekonomike, sipas analistëve, dëshmon forcimin e ekonomisë më të madhe në botë.

Kështu, ndër të tjera, në fundjavë është publikuar se në muajin janar në SHBA numri i të punësuarve është rritur për 225.000 persona, për 160.000 më shumë se sa kishin parashikuar analistët e Reuters

“Këto të dhëna tregojnë se tregu amerikan i punës dhe ekonomia vazhdojnë rritjen. Dhe, siç duket, Fed për një kohë do të jetë e qetë,” tha Olivier Konzeouse nga kompania “Saxo Markets”.

Rritja e dollarit, konstatojnë analistët, ka ndodhur edhe për shkak të uljes së preferencave të investitorëve ndaj riskut ndërsa po vlerësohen pasojat e epidemisë së koronavirusit në ekonominë kineze, kur numri i të vdekurve dhe atyre të infektuar në Kinë, vazhdon të rritet.

Dhe deri sa vlera e dollarit vazhdon rritjen, euro ishte në nën presion për shkak të dobësimit të ekonomisë gjermane, lokomotivë kjo e eurozonës, dhe niveli i saj ka pësuar rënien më të madhe nga muaji tetor.

Sipas të dhënave të Zyrës së statistikave gjermane, prodhimi industrial vetëm në muajin dhjetor ka rënë për 3.5 për qind, që është dhe rënia më e madhe nga janari i vitit 2009.

Analisti i bankës MUFG, Derek Halpenny, thotë se të dhënat negative nga Gjermania kanë futur në dhe deklaratat e para pak kohëve të Presidentes së Bankës Qendrore të Europës, ECB, Christine Lagarde, se ekonomia  e eurozonës po stabilizohet.

Në bursat amerikane dhe ato evropiane vlerat e aksioneve janë rritur fuqishëm duke arritur nivelin më të madh në histori, përkundër përhapjes së koronavirusit në Kinë dhe jashtë saj.

Në Wall Street, Dow Jones është rritur për 3 për qind, në 29.102 pikë, deri sa S&P 500 është rritur për 3.1 për qind, në 3.327 pikë, e indeksi Nasdaq 4 për qind, në 9.520 pikë.

Indeksi S&P 500 ka shënuar rritjen më të madhe javore në tetë muajt e fundit, ndërsa të enjten ka shënuar nivelin më të madh në histori. Mendohet se pasojat e koronavirusit nuk do të jenë aq të mëdha.