Tragjedia në Bulqizë, Basha: Tronditje dhe dhimbje…

Kryetari i Partisë Demokratike, Lulzim Basha, shprehet se me tronditje dhe dhimbje ndoqi lajmin për tragjedinë në Ostren të Bulqizës ku humbën jetën një nënë dhe dy fëmijët e saj, ndërsa i shprehu ngushëllime familjes Tola.

“Me tronditje dhe dhimbje ndoqa lajmin për tragjedinë në Ostren të Bulqizës ku humbën jetën një nënë dhe dy fëmijët e saj. Shpreh ngushëllimet e mia të thella për familjen Tolaj,” thekson kryetari i PD, Lulzim Basha përmes rrjetit social Twitter duke i uruar shërim të shpejtë vajzës tjetër të familjes që po merr ndihmën mjekësore.

Ndryshe, tragjedia e rëndë, ku nëna me dy fëmijët e saj, 14 dhe 18 vjeç u asfiksuan për vdekje nga një rrjedhje gazi ndodhi gjatë natës në Ostren të Bulqizës, ku për pasojë humbën jetën Rajmonda Tolaj, 40 vjeçe dhe dy fëmijët, Rudina dhe Fajtoni, 18 dhe 14 vjeç, ndërsa në spital ndodhet motra e vogël 8-vjeçare, Merita.

Nëna me 3 fëmijët jetonin të vetëm, pasi kryefamiljari Tolaj është emigrant në Greqi.