Pas takimit me Aleatët, Basha: Nuk ka forcë mbi tokë ta ndalë rotacionin

Pas takimit me Aleatët i cili pasoi takimin me Presidentin e Republikës, Ilir Meta, Kryetari i Partisë Demokratike, Lulzim Basha, tha se kapja e Kushtetueses është objektiv i Edi Ramës në mënyrë që të mbrojë kriminelët dhe pushtetin e paligjshëm. Por, lideri i opozitës e tha qartë dhe prerë se Edi Rama i ka bërë hesapet gabim dhe se nuk ka forcë mbi tokë ta ndalë rotacionin.

“Presidenti i Republikës më ka njohur me të tjera fakte dhe prova tronditëse të përfshirjes së zyrtarëve të larët të mazhorancës për kapjen e Gjykatën Kushtetuese. E kemi thënë, dua ta përsëris, kapja e Gjykatës Kushtetuese është objektiv i Edi Ramës. Edi Ramës i duhet Gjykata Kushtetuese për të mbrojtur dhe liruar kriminelët me të cilët ka marrë pushtetin. I duhet Gjykata Kushtetuese për të mbrojtur pushtetin e paligjshëm që është produkt i bashkëpunimit të tij me krimin dhe është investuar në mënyrë të hapur dhe kriminale për të kapur Gjykatën Kushtetuese. Ky është ashtu siç e cilëson edhe Presidenti i Republikës një grusht i pastër institucional, një grusht i pastër institucional shteti. Nuk bëhet me të vërtetë me ushtri dhe me tanke, por bëhet me shërbëtor të bindur të qeverisë në organet e reja të drejtësisë.”

Dhe jo vetëm kaq! Lulzim Basha tha se ka diskutuar me Ilir Metën edhe për hapa të tjerë të mazhorancës që bëhen për të rrezikuar të drejtat e shqiptarëve.

“Ne kemi një papajtueshmëri të plotë me këtë zhvillim dhe do të marrim çdo vendim si opozitë. Duke i bërë thirrje çdo qytetari, përtej bindjeve politike, që hapa të tillë që shkatërrojnë themelin e demokracisë, Kushtetutën, të ndeshen me bashkimin më të madh qytetar dhe me rezistencën më të madhe qytetare. Kur bie Kushtetuta, bie garancia elementare, çdokush është i rrezikuar, çdo prind, çdo fëmijë, i punësuar në administratë apo në sektorin privat, student apo pensionist; të drejtat e tyre janë të rrezikuara.”

Sot, tha lideri i opozitës, njerëzit presin zgjidhje dhe kjo zgjidhje nuk mund të jetë thjeshtë kalkulim i partisë time apo i koalicionit opozitar, sepse mendoj se të gjithë e kanë të qartë.

“Ndryshimi është i pashmangshëm. Rrotacioni është i pashmangshëm.
Gjithë beteja e oligarkisë, kriminelëve dhe Edi Ramës, është ta fusë rrugën drejt rrotacionit të pashmangshëm në labirinte që ta zgjasin ose mundësisht ta shmangin. Ne nuk do ta pranojmë këtë. Nuk do të ketë forcë mbi tokë ta ndalë rrotacionin, ta ndalë ardhjen në pushtet të opozitës së bashkuar me votën e qytetarëve.”

Me këtë rast, Kryetari i Partisë Demokratike e tha qartë dhe prerë:

“Ne do të vazhdojmë bashkëbisedimin me qytetarët. Unë do të vazhdoj ti dëgjoj ata dhe pas kësaj do të shpalosim ofertën tonë. Ne do të bëjmë gjithçka të garantojmë një proces zgjedhor përmes një reforme zgjedhore, për të cilën jemi tërësisht të angazhuar.”

Por, tha në fund, Kryetari i Partisë Demokratike, Lulzim Basha, se nuk ka forcë që do të ndalë rotacionin:

“Edi Rama i ka bërë hesapet gabim. Ia kam thënë para një muaji, po ja përsëris: Nuk ka forcë mbi tokë ta ndalë rotacionin.”

Ndryshe, sot Presidenti i Republikës ka zhvilluar një takim me Kryetarin e Partisë Demokratike, me kërkesën e Ilir Metës ku dhe e informoi Lulzim Bashën për përpjekjet e Edi Ramës për grusht shtet ndërsa kërkoi nga lideri i opozitës që të informoj edhe drejtuesit e partive të tjera opozitare.