Kur provon kokëfortësinë e Ilir Metës!

nga Agim Popoci

Në luftën e radhës me Kryetarin e Partisë Socialiste, Ilir Meta tashmë i kërcënuar edhe nga prangat e Edi Ramës, fton shqiptarët më 2 Mars në një protestë të madhe popullore dhe lëshon një kumt kërcënues duke thënë se “është mirë të mos e provojë askush kokëfortësinë time”. Dhe jo vetëm kaq! Ndërsa lëshon kumtin, futet në strehën e fundit, patriotizmin, duke e shprehur me këngën, Për ty atdhe!

Ndonëse e konsideron vlerë, nga betejat e kaluara me kryetarët e Partisë Socialiste, nga kokëfortësia e tij kanë pësuar vetëm bashkëpunëtorët ndërsa i fituari përveç kryesocialistit ishte vetëm Iliri Meta!

Për ty atdhe, Ilir Meta u bë bashkë me Pandeli Majkon në luftë me kryetarin e Partisë Socialiste, Fatos Nano, dhe nga kokëfortësia e Metës humbi vetëm Majko. Kryeministër i Shqipërisë u bë Ilir Meta ndërsa Nano e finailzoi këtë luftë me rizgjedhjen në krye të PS.

Për ty atdhe, në luftën kundër kryetarit të Partisë Socialiste, Ilir Meta me kokëfortësinë e tij krijoi koalicionin qeverisës me kryetarin e Partisë Demokratike, Sali Berisha, dhe si Zv/Kryeministër i Shqipërisë shkaktoi trazirat e 21 janarit, për ta goditur koalicionin e qeverisës, pjesë e të cilit ishte vetë, për t’iu bashkuar në fund, vetë kryetarit të PS, Edi Rama.

Për ty atdhe, në luftën kundër kryetarit të Partisë Socialiste, në momentin kur i erdhi urdhri nga Presidenti i Serbisë dhe Internacionalja Socialiste, ai me kokëfortësinë e tij braktisi Sali Berishën për të bërë koalicion qeverisës me kryetarin e PS; Koalicion i cili i mundësoi Ilir Metës që me kokëfortësinë e tij të bëhet Kryetar i Parlamentit të Shqipërisë. Dhe jo vetëm kaq!

Për ty atdhe, kryetari i Partisë Socialiste me kokëfortësinë e Ilir Metës vjedhi zgjedhjet lokale të vitit 2015 dhe ato të pjesshme të vitit 2016, që sot ky krim elektoral njihet si Dosja 184, në mënyrë që Edi Rama ta bëjë President të Republikës.

Për ty atdhe, bashkëpunëtori i vetëm që nuk provoi kokëfortësinë e Ilir Metës në luftën kundër Kryetarit të Partisë Socialiste ishte Edi Rama, dhe kjo është arsyeja e vetme që sot Rama është kryetar i PS.

Për ty atdhe, kjo nuk e bëri që Ilir Meta të zmbrapset por ai vazhdojë luftën me kryetarin e Partisë Socialiste. Sot Ilir Meta mendon ta përfshijë kryetarin e Partisë Demokratike, Lulzim Basha, në këtë luftë që nuk iu nda kurrë ndërsa lëshoi mesazhin shumë të qartë, i cili vetëm Bashës mund ti shërbej: Është mirë të mos e provojë askush kokëfortësinë time!

Duke pasur parasysh përvojat e të gjithë atyre që bashkëpunuan me Ilir Metën, duke pasur parasysh 15 marsin, ditën kur duhet të përmbyllet Reforma Zgjedhore, sot, nëse Lulzim Basha mendon ta provojë kokëfortësinë e  Metës në luftën me kryetarin e Partisë Socialiste duke iu bashkuar protestës ose marrëzisë që “patrioti Meta” e quan, besëlidhje, duhet ta ketë sqartë se më 2 mars, i humbur padyshim do të jetë vetëm ai, Basha.

Si dje ashtu edhe sot, ka Serbi, ka Internacionale Socialiste, dhe ka post të Kryeministrit të Shqipërisë. Për derisa futi në furrën e kokëfortësisë së tij, Majkon, Nanon dhe Berishën, çfarë i mungon Lulzim Bashës që nuk mund të pësoj nëse shkel në këtë furrë të Ilir Metës!

Në fund, për kokëfortësinë që Ilir Meta mundohet ta shes si vlerë. Filozofi i njohur francez Jean Paul Sartre thotë:

Kokëfortësia është energjia e budallenjve!