Basha me grevistët e Poçemit: Të tradhëtuar dhe keqtrajtuar nga qeveria!

Kryetari i Partisë Demokratike, Lulzim Basha, gjatë takimit me punonjësit e nënstacionit elektrik të Poçemit dhe ata të Uzinës në Ballsh që janë futur në grevë urie prej disa ditësh tha se ata janë tradhëtuar, dhe keqtrajtuar nga qeveria ndërsa premtoi do ti zhbëj të gjitha padrejtësitë ndaj tyre.

“Mbështetje pa kusht për punëtorët dhe kërkesat e tyre! Ata janë tradhëtuar, dhe keqtrajtuar nga qeveria. Viktimat e Edi Rames janë njerëzit e thjeshtë, qytetarët e ndershëm shqiptarë që luftojnë për mbijetesë dhe një jetë normale,” tha Lulzim Basha duke përsëritur se në këtë betejë ai dhe Partia Demokratike do jenë zëri dhe mbështetja e tyre ndërsa përfundoi:

“Beteja juaj është beteja e çdo shqiptari, ne do të na keni në krah deri në plotësimin e kërkesave tuaja të drejta. Ju jap fjalën se do ti zhbëj të gjitha padrejtësitë ndaj jush.”

Ndryshe, 14 punonjës të nënstacionit elektrik dhe stacionit të pompimit, në Poçem të Mallakastrës, janë futur sot në ditën e tetë të grevës së urisë, ndërsa 10 punonjësit e Uzinës në Ballsh janë futur në ditën e katërt të grevës duke kërkuar rrogat e prapambetura.