Përurohet shtatorja e Majlinda Kelmendit

Në parkun e qytetit në Pejë, sot është përuruar shtatorja e sportistes më të suksesshme kosovare, Majlinda Kelmendi. Ani pse është përfolur shumë rreth lokacionit të vendosjes së kësaj statuje, Federata Botërore e Xhudos së bashku me trajnerin Driton Kuka, pas mos gjetjes së hapësirës në kryeqytetin e Kosovës, Prishtinë kanë vendosur që këtë statujë ta vendosin në Pejë.

Përurimin e shtatores e ka bërë presidenti i Federatës Ndërkombëtare të Xhudos, Marius Vizer, i cili ishte i pranishëm edhe në ceremoninë e Laureatëve 2019, të organizuar nga Komiteti Olimpik i Kosovës të enjten, aty ku pikërisht Majlinda Kelmendi u shpall si sportistja më e mirë për vitin që lamë pas.

Sportistja më e mirë e zgjedhur mbrëmë nga KOK-u, Majlinda Kelmendi me rastin e përurimit të shtatores së saj u shpreh se shpreson që kjo statujë të ju shërbejë të rinjve që të arrijnë sukseset të cilat ajo i ka arritur në jetë.

Kelmendi: Statuja e ka vendin në Pejë

“Sot është një ditë historike, jo vetëm për ju. Besomëni  se si jeni duke e përjetuar ju, unë jam duke e përjetuar edhe 2 herë më shumë. Kam shumë emocione. Faleminderit shumë që keni ardhur. Shumë njerëz më kanë pyet që a kish me qenë më mirë që statuja me qenë në Prishtinë, por unë po mendoj që e ka vendin këtu ku jam rritur, ku e kam filluar karrierën. Po besoj shumë që kjo statujë do t’i motivojë shumë fëmijët në Kosovë edhe kam me i bind edhe ata që do t’i arrijnë sukseset si unë. Gjithçka kam filluar prej këtij vendi të vogël dhe i kam arrit majat e botës”, u shpreh Kelmendi.

Presidenti i Federatës Botërore të Xhudos, Marius Vizer u shpreh se Majlinda është një ndër sportistet më madhështore në botë. Ai ndër tjerash deklaroi se Kosova duhet të mburret që ka një xhudiste siç është pikërisht Majlinda Kelmendi.

Vizer: Kelmendi është një ndër sportistët më madhështore në botë

“Është një nder dhe kënaqësi e madhe për sportin tonë që të kemi një përfaqësuese të tillë një nga atletet më madhështore në botë si dhe një nga më të mirat brenda familjes së xhudos. Unë dua t’ju uroj të gjithë juve si komb i Kosovës për këtë arritje, para së gjithash faleminderit Majlinda, Driton, Agron dhe të gjithë familjes Xhudos të mbështetur nga Qeveria nga Komiteti Olimpik dhe nga shpirti i tyre e cili është edhe shpirti I kombit të Kosovës gjithashtu. Unë mendoj se rezultati i Majlinda është frymëzimi më i mirë për të gjithë sportin kosovar për kombin dhe ju mund të jeni krenar që një nga përfaqësuesit më të mirë të sportit në botë është bartësi i flamurit të kombit tuaj”, deklaroi Vizer.

Kryetari i Federatës së Xhudos të Kosovës, Agron Kuka deklaroi se të arriturat e Majlinda Kelmendit janë historike, si dhe foli rreth bashkëpunimit me Federatën Botërore të Xhudos, veçanërisht me presidentin Marius Vizer i cili njihet si një mik i madh i Kosovës.

Kuka: Majlinda dhe Dritoni na kanë bërë krenar çdoherë

“Kemi shkuar aq lartë saqë mbështetja e pa rezervë e presidentit Vizer po kulmon sot këtu me zbulimin e shtatores së heroinës sonë të gjallë, kampiones Olimpike, Botërorë e Evropiane, Majlinda Kelmendit. Prapa gjithë kësaj natyrisht qëndron skalitshi i sportistëve kulminant, trajneri i përmasave globale, Driton Kuka”, tha Kuka.

E pranishme në këtë ceremoni ishte edhe kryetarja e kuvendit të Kosovës, Vjosa Osmani e cila u shpreh se personat si Majlinda Kelmendi janë inspirim për të rinjtë tanë. Ajo gjithashtu deklaroi se sporti është fusha e cila ka bërë hapa të mëdha në prezantimin e shtetit të Kosovës në arenën ndërkombëtare.

Osmani: Kelmendi është inspirimi më i mirë për të rinjtë tanë

“Faleminderit Majlinda që u bëre inspirim jo vetëm i nxënësve në shkollën tënde, të cilën ne sot e vizituam, fotografia është aty ku ata çdo ditë hypin në katin e dytë për të mbajtur mësim, inspirohen dhe frymëzohen, por mbi të gjitha nga ti mësojnë që të mos dorëzohen kurrë. Faleminderit po ashtu që dëshmove se lotët e tua u shndërruan në diamant të fuqishëm për secilin qytetarë të Kosovë në mënyrë që pavarësisht sfidave dhe pavarësisht vështirësive që i kanë në profesionin e tyre në shkollën e tyre që të mos dorëzohen, por ta ngrisin shtetin e tyre në piedestalin më të madh. Faleminderit bashkë me Toni Kukën dhe të gjithë të tjerët që ngritën flamurin e Republikës sonë të re edhe në ato vende që ne politikanët nuk arritëm kurrë. Kjo dëshmon që sporti dhe shumë fusha të tjera të artit dhe të kulturës, por mbi të gjitha rinia jonë kanë qenë një hap apo edhe shumë hapa para nesh. Ka ardhur koha që edhe politika edh institucionet ta arrijnë nivelin tuaj dhe të bëjnë krenar gjithë Kosovën”, u shpreh Osmani.

Ministrja për Kulturë, Rini dhe Sport, Vlora Dumoshi me këtë rast u shpreh se është pikërisht Majlinda ajo e cila e valëviti flamurin e Kosovës në ato vende ku të tjerët nuk mund ta bënin një gjë të tillë.

Dumoshi: Majlinda është heroina jonë e gjallë

“Sot kemi ardhur në Pejë, për shtatoren e heroinës sonë së gjallë, Majlinda Kelmendit. Majlinda lindi këtu, e mësoi gjuhën këtu dhe atë gjuhën shqipen tonë e valëviti me flamurin tonë ku edhe na erdh medalja olimpike e parë. Majlinda ti je krenaria jonë, ti je guximi jonë. Xhudoja ka një histori e cila lidhet edhe me popullin tonë, me një pjesë luftarake. Sot jetojmë në liri dhe urojmë të gjithë xhudistët tanë që do të marrin pjesë këtë vit në Olimpiadë të kthehen me medalje”,deklaroi Dumoshi.

Kjo shtatore e Majlinda Kelmendit është dhuratë për Kosovën nga Federata Ndërkombëtare e Xhudos, në krye me Maruis Vizer. Ai ka angazhuar artistë të njohur botëror për të punuar shtatoren e bronztë për kampionen Majlinda Kelmendi.
Kujtojmë që Majlinda është sportistja e vetme e Kosovës me medalje Olimpike. Ajo fitoi të artën në kategorinë -52 kg të xhudos në Lojërat Olimpike RIO 2016.