Vuçiç: Nuk ka njohje të Kosovës pa fituar edhe Serbia diçka

Nuk ka gjë nga ajo që ne të njohim Kosovën e të mos fitojmë asgjë, ka deklaruar sot në Novi Sad, Presidenti i Serbisë, Aleksandar Vuçiç. Ndërkohë Në pyetjen e gazetarëve se si do t’i përgjigjet Serbia ultimatumit të Prishtinës, Vuçië është përgjigjur po me pyetje:

“Çfarë ultimatumi? Që ne të detyrohemi t’i pranojmë, e të mos fitojmë asgjë? Nuk ka gjë prej kësaj,” është shprehur Vuçiç, raporton B92.

Le të bëjnë ata punën e vet, ne tonën, pastaj të shohim kush del më i suksesshëm, tha presidenti i Serbisë, duke shtuar se me këtë rast është vendimtare të ruhet paqja dhe stabiliteti.

Vuçiç është i bindur se Shtetet e Bashkuara janë serioze në qëllimet që taksa e Prishtinës ndaj produkteve serbe të hiqet dhe se beson se presionet amerikane do të vazhdojnë. Ndërkohë i pyetur nëse pas vizitës në SHBA mendoon se Washingtoni kërcënon seriozisht kryeministrin e Kosovës, Albin Kurti, me heqjen e taksës, Vuçiç ishte i prerë:

“Absolutisht po. Washingtoni është absolutisht serioz me dëshirat e tij për heqjen e taksës nga ana e Prishtinës dhe unë u jam mirënjohës njerëzve në Shtëpinë e Bardhë, në radhë të parë, dhe në Departamentin e Shtetit,” tha Presidenti i Serbisë, Aleksandar Vuçiç.