Koronavirusi në Shqipëri/ Anulon aktivitetet, Basha: Nuk është koha për panik, por për masa të shpejta!

Kryetari i Partisë Demokratike, Lulzim Basha, ka anuluar dy aktivitetet publike të parashikuara për pasditen e sotme dhe duke për thirrje për një reagim të kujdesshëm dhe me përgjegjshmëri thekson se sot nuk është koha për panik, por për masa të shpejta dhe të vendosura.

“Asnjë vend nuk është imun ndaj rrezikut të koronavirusit, dhe tani që kemi rastet e para të konfirmuara edhe në Shqipëri, është më e rëndësishme se kurrë që të gjithë të reagojmë me kujdes dhe me përgjegjshmëri,” thekson Lulzim Basha në reagimin e tij përmes rrjetit social Facebook ndërsa bënë thirrje për sakrifica në mënyrë që të luftojmë përhapjen e virusit:

“Të kujdesemi shumë për higjenën tonë personale, të kufizojmë udhëtimet dhe nëse nuk ndihemi mirë të rrimë në shtëpi,” është mesazhi i Kryetarit të Partisë Demokratike, Lulzim Basha ndërsa përfundon:

“Sot nuk është koha për panik, por për masa të shpejta dhe të vendosura.”

Ndryshe, dy aktivitetet e anuluara për sot nga Kryetari i Partisë Demokratike, Lulzim Basha, ishin parashikuar me gratë shqiptare dhe mësuesit. Në Kalanë e Tiranës ishte përgatitur një event kushtuar grave shqiptare për kontributin e tyre në shoqërinë tonë. Aktiviteti, ku ishte parashikuar pjesëmarrja e rreth 300 grave dhe vajzave, do të zhvillohet në një moment tjetër, kur shëndeti i qytetarëve të mos konsiderohet i rrezikuar. Aktiviteti i dytë ishte planifikuar në orën 15:00, një dëgjesë me mësuesit, pjesë e turit “potëdëgjoj”, por edhe ky event do të shtyhet për një moment tjetër.