Edhe fuksët kur pakësohen, në vendet moderne mbrohen me ligj!

Kuvendi i Partisë Demokratike përfundoi. Ishte një kuvend me retorikë dhe kundështi. Në shumë raste me shqetësimin dhe dëshirën e mirë që partia kryesore e opozitës, forca e parë politike opozitare në Shqipëri, të ringrihet, të kthejë shpresën, të bëhet dhe të krijojë mazhorancën politike, morale dhe qeverisëse në këtë vend të shkatërruar nga krimi e kriminelët, trafiqet dhe trafikantët, korrupsionin dhe të korruptuarit.

Disa të tjerë shkuan në kuvend me axhendën e tyre personale. Për të thënë se “e dua ose nuk e dua Lul Bashën”, se “më i mirë është Ridvan Bode se sa Arben Ristani”! Disa edhe për të bërë kasandrën dhe kërcënuar se “Statuti do ta shkatërrojë përfundimisht PD-në”! Ndërsa “tribunët” u duartrokitën edhe kur i drejtoheshin me gisht liderit historik, Sali Berisha, në një rast të vetëm u fërshkëllye folësi kritik i kryetarit aktual, konkurenti i tij i vetëm për postin e kryetarit. Fërshëllima nuk erdhi për ato që artikuloi autori. Nëse do të ishte për këtë, do të ishin fërshëllyer edhe diskutantë të tjerë antiBashë, madje dhe antiBerishë! U fërshkëllye ai që për pesë vite në opozitë nuk mundi të thotë as një fjalë të vetme për krimin në pushtet të instaluar me bekimin e nën kujdesin e kryeministrit të vendit. U fishkëllye personi! Kjo nuk ka të bëjë me kulturën demokratike, ka të bëjë me besueshmërinë që krijohet midis politikanit dhe elektoratit që e zgjedh atë. Nuk u fërshëllye ideja dhe kritika e Eduard Selamit, u anatemua sjellja e tij antiopozitare në raportet që ai mban me klikën kriminale të pushtetit të sotëm.

Raporti i besuedhmërisë do ta përcaktojë gjithashtu të ardhmen e Partisë Demokratike, të liderëve të saj dhe të secilit që është votuar e do të votohet në këtë subjekt politik. Besimi midis liderëve politikanë dhe atyre që i votojnë nuk krijohet në një ditë. As nuk bëhet vetëm me kritika e sulme pafund kundër forcës politike, së cilës i përket. Fatkeqësisht kritikët e zotit Basha në shumicë e filluan fushatën në momentin kur humbën shpresën për të qenë deputetë në Kuvendin e Shqipërisë. Ata gabuan, sepse nuk patën durimin që llogarinë personale të tyre ta kauzë kolektive të anëtarëve të PD-së.

Megjithatë nga dështimi i kundërshtarëve të tij nuk ka pse të jetë i lumtur kryetari aktual, Basha. Në një betejë të brendshme askush nuk del i fituar. Nëse flasim për atë raportin e besueshmërisë, pikërisht ky raport është lëkundur edhe në marrëdhënien e kryetarit me bazën e partisë. Dhe unë nuk shqetësohem nga fakti që në PD dalin bashkëpunëtorë të kundërshtarit politik, aq më pak nga kritikët e lidershipit. Madje kritika dhe kritikët më bëjnë entusiast. Bashkëpunëtorët e pushtetit me neverisin! Vetëm kaq.

Zoti Basha duhet t’i dallojë kritikët nga bishtpërdredhurit! Kritikët janë aset, janë vlerë edhe kur ata gabojnë. Bishtpërdredhurit duhen injoruar edhe atëherë kur ankohen se po injorohen. Nuk duhet askush në PD të merret me ta! As publikisht, as skutave në tavolina! Në fund të fundit edhe fuksët janë qenie të gjalla dhe kanë të drejtë të kenë një vend në këtë hapësirë! Madje kur rraca e tyre pakësohet, në vendet moderne mbrohen me ligj! Ndërsa kur janë me shumicë shpërfillen!

Në fund të fundit Partia Demokratike pas këtij kuvendi ka një shans: – Të ringrihet, të ribëhet, të rikthejë lavdinë e saj të dikurshme e mbi të gjitha të rikthejë shpresën e shqiptarëve për të ardhmen! Kjo nuk do të arrihet duke ndjekur nga pas fuksët, as duke i injoruar kritikët e sinqertë. Me këta të fundit duhet bashkëpunim, duhet mirëkuptim!

Partia Demokratike ka shansin të riorganizohet, të vetadministrohet, të rigjenerohet! I duhej statuti, tani ajo e ka atë! Tani i duhet një njeri i fuqishëm me integritet dhe autoritet të padiskutueshëm, që të merret e organizimin e partisë. Asnjë kryetar partie nuk ka mundësi të merret në detaje me këtë çeshtje.

Partia Demokratike ka realizuar me sukses disa aksione politike në pesë vitet e fundit. Dekriminalizimi, denoncimi i kanabizimit dhe lidhjeve të pushtetit me krimin e mafien, janë disa aksione shumë të suksseshme të saj. Por zoti Basha duhet të mos kompleksohet! Aksionët politike që nis duhet t’i çojë deri në fund! Kështu do ta forcojë besimin si lider te elektorati dhe anëtarët e PD-së. Partia Demokratike ka nevojë të bashkohet, të lidh brezat e anëtarësisë së saj në një nyje të vetme! Në ndryshim nga partia kundërshtare e saj në pushtet, ajo nuk ka pse turpërohet nga e shkuara e saj. Përkundrazi është partia e lirisë. Por kjo nuk do të thotë se nuk duhet të reflektojë për gabimet që janë bërë!

Partia Demokratike është partia e orientimit substancial perendimor. Si e tillë ajo duhet të konkurojë me sukses çdo forcë tjetër politike në krijimin e raporteve pozitive me SHBA-të dhe BE-në. Por i duhet të dëshmojë e ta bindë elektoratin në radhë të parë dhe botën e vendeve demokratike se lufton kundër korrupsionit, krimit të organizuar, kundër arrogancës dhe padrejtësisë. Për të gjitha këto Partisë Demokratikë i duhet një program politik i saktë i qartë, modern dhe bindës. Pra PD tashmë e ka shansin të shndërrohet në një alternativë të besueshme dhe të mobilizoje rezurse të shumta në këtë drejtim!