“Përhapja e virusit”, Basha: Të dhënat e Edi Ramës janë kontradiktore!

Pas publikimit të dhënave nga Kryeministri Edi Rama lidhur me përhapjen e koronavirusit ka reaguar Kryetari i Partisë Demokratike, Lulzim Basha, duke theksuar se kemi të bëjmë me të dhëna kontradiktore nga ato që jep Ministria e Shëndetësisë:

“Shifrat janë kontradiktore. Të tjera shifra jep Kryeministri, të tjera shifra jep Ministria e Shëndetësisë dhe kjo duhet të marrë fund. Nuk dua të futemi në debat janë apo nuk janë shifrat këto që jepen, e rëndësishme është të ketë një transparencë dhe të ketë një testim, i cili të jetë i besueshëm. Nëse testoni 15 vetë dhe 12 vetë dalin të infektuar, këtu ka një problem. Në qoftë se numri i testimeve për të paktën tre javët e para nuk ka kaluar 50, këtu ka një problem,” shprehet Lulzim Basha duke shtuar se kjo është dhe arsyeja pse ka kërkuar rritjen e numrit të testimeve:

“Prandaj e kam parashtruar edhe institucionalisht. Sot janë mbushur 2 javë që kur e kam kërkuar. Na eshte thënë 10 mijë teste. Nuk e di çfarë bëhet, kanë ardhur këto 10 mijë teste apo jo?! Bashkë me testet rritet mundësia për të testuar, sepse nga njëra anë kryeministri thotë se po të duam mund të bëjmë edhe 2 mijë teste, nga ana tjetër del Instituti i Shëndetit Publik dhe thotë se kapaciteti ynë për teste është 500,” thotë Kryetari i PD, Lulzim Basha duke konstatuar se qartësisht ka një problem ndërsa përfundon:

“Ose kryeministri nuk e di se për çfarë po flet, ose po flet para se të flasin ekspertët. E rëndësishme është që Shqipëria të ketë mjaftueshëm kapacitete për testim.”