Sërish me shembull të çuditshëm, Edi Rama: Kur u lejua riatdhesimi në Singapor…

Pas kufomave nga Irani, arkivoleve nga Italia, liderin e opozitës nga Portugalia etj.etj. sot Kryeministri Edi Rama sjellë Singaporin i cili, sipas tij, u mbajt si shembulli më fantastik i përballjes me epideminë, me numrin mē të vogël të të infektuarve e të të vdekurve për numër popullsie, por gjërat u përkeqësuan kur u lejua riatdhesimi i pak më shumë se 500 studentëve, të cilëve i’u kërkua të vetëkarantinoheshin në familje, pa futur në karantinë gjithë familjen.

“Numri i të infektuarve u rrit ndjeshëm, përmes familjarëve të të riatdhesuarve dhe ky ishte një mësim, jo vetëm për Singaporin po edhe për vendet e tjera, të cilat fillimisht ulën ndjeshëm numrin e të riatdhesuarve, duke i detyruar të karantinohen në hotele dhe pastaj filluan të ndalonin fare riatdhesimet,” sjell shembullin konkret Edi Rama duke u munduar të na bindë se çfarë hata projekti na qenka riatdhesimi i 500 njerëzve sa duhet lodhur kokën aq shumë, e për ta çuar mendjen deri në Singapor, ndërkohë njerëzit vazhdojnë dhe rrijnë rrugëve të Evropës ose edhe më keq, në kufirin shqiptar.

“Ne do të rihapim rrugën e riatdhesimeve siç e kemi bërë publike dhe nuk do të tërhiqemi nga kushti i karantinimit të detyruar në hotel! Por ju lutem të gjithë atyre të cilët nuk duan të dëgjojnë, nuk duan të lexojnë, nuk duan të kuptojnë se pse, kjo rrugë është e vetmja dhe s’ka një rrugë tjetër për të mbrojtur popullin e vendin tonë nga një valë e re infektimi, që të paktën, përpara se sa të shajnë e të mallkojnë a thua se kjo është punë qejfi apo dëshire e qeverisë për t’ua vështirësuar riatdhesimin, të të bëjnë edhe njëçikë durim derisa ta shohin konkretisht paketën e riatdhesimit! I siguroj që paketa do të jetë shumë e arsyeshme për ta dhe qeveria do të bëjë gjithçka mundet që kostoja financiare e riatdhesimit, të jetë optimale brenda kushteve ku po jetojmë e po veprojmë të gjithë,” thekson Edi Rama në reagimin e tij përmes rrjetit social Facebook duke përfunduar:

“Boll me sharje, me akuza, me hesape në hava e me mallkime, sepse kjo është koha që provon se sa di secili të jetë një shqiptar i mirë që sheh përtej hundës së vet dhe që nuk e kthen në argument mllefin apo mosinformimin për atë që flet!”

Besoj se çdo njeri civil u ngop me sharje, akuza, hesape hava dhe mallkime, ama edhe me mashtrime qeveritare dhe terrorizime kryeministrore të mendjes dhe shpirtit.

Kryeministri Edi Rama po mundohet që luftën e tij me koronavirusin të na paraqet me copëza nga bota për ta plotësuar pazëllin e Surrelit.

Jo, jo, mos shko fare në Singapor, ja ku e ke Kosovën! Më 3 Prill në Qytet Studenti ishin të karantinuar 500 të riatdhesuar nga ajri dhe toka, nuk i pyeti njeri, ishte me detyrim dhe nën kontrollin e policisë dhe ushtrisë. Por, nuk u bë ndonjë spektakël.

Ca yje të muzikës dhe sportit u ankuan për kushtet dhe izolimin në të cilin u detyruan, por në karantinë ata u dërguan me vendim të mjekëve dhe ekspertëve dhe jo Kryeministrit. Nuk ndodhi ndonjë hata, ata që ishin me COVID-19 u trajtuan si të tillë në Spitalin Infektiv, të tjerët pas 2 jave u lanë të lirë dhe sot kjo Qendër vazhdon edhe sot të jetë funksionale.

Problemi nuk ishte dhe nuk është me riatdhesimin nën kontroll, problemi kryesor ishte dhe mbeti pse nuk u mbyllën kufijtë me kohë, dhe shumë të papërgjegjshëm, e ka prej tyre edhe që nuk ishin të tillë por thjeshtë nga mosdija, i dhuruan familjes koronavirusin në rastin më të mirë, dhe në rastin më të keq edhe vdekjen. Pikë!

Ndryshe, të drejtën për tu kthyer në atdhe në këtë situatë pandemie, sipas qeverisë, do ta kenë vetëm ata që kanë para për të paguar biletën e avionit dhe qëndrimin prej 14 ditësh në hotel. Ministrja e Infrastrukturës, Belinda Balluku nuk do të marrë mendimin dhe as listën e ambasadave, por ka vendosur të veprojë vetëm me një kompani ajrore, madje duke organizuar dhe hotelet ku do të qëndrojnë shqiptarët e mbetur jashtë kufirit.

Ja statusi i plotë:

? NJË SHEMBULL KONKRET PSE RIATDHESIMI NË KËTË FAZË DUHET TË JETË ABSOLUTISHT I KONTROLLUAR:

Singapori u mbajt si shembulli më fantastik i përballjes me epideminë, me numrin mē të vogël të të infektuarve e të të vdekurve për numër popullsie. Por gjërat u përkeqësuan kur u lejua riatdhesimi i pak më shumë se 500 studentëve, të cilëve i’u kërkua të vetëkarantinoheshin në familje, pa futur në karantinë gjithë familjen. Numri i të infektuarve u rrit ndjeshëm, përmes familjarëve të të riatdhesuarve dhe ky ishte një mësim, jo vetëm për Singaporin po edhe për vendet e tjera, të cilat fillimisht ulën ndjeshëm numrin e të riatdhesuarve, duke i detyruar të karantinohen në hotele dhe pastaj filluan të ndalonin fare riatdhesimet.

Ne do të rihapim rrugën e riatdhesimeve siç e kemi bërë publike dhe nuk do të tërhiqemi nga kushti i karantinimit të detyruar në hotel! Por ju lutem të gjithë atyre të cilët nuk duan të dëgjojnë, nuk duan të lexojnë, nuk duan të kuptojnë se pse, kjo rrugë është e vetmja dhe s’ka një rrugë tjetër për të mbrojtur popullin e vendin tonë nga një valë e re infektimi, që të paktën, përpara se sa të shajnë e të mallkojnë a thua se kjo është punë qejfi apo dëshire e qeverisë për t’ua vështirësuar riatdhesimin, të të bëjnë edhe njëçikë durim derisa ta shohin konkretisht paketën e riatdhesimit! I siguroj që paketa do të jetë shumë e arsyeshme për ta dhe qeveria do të bëjë gjithçka mundet që kostoja financiare e riatdhesimit, të jetë optimale brenda kushteve ku po jetojmë e po veprojmë të gjithë.

Boll me sharje, me akuza, me hesape në hava e me mallkime, sepse kjo është koha që provon se sa di secili të jetë një shqiptar i mirë që sheh përtej hundës së vet dhe që nuk e kthen në argument mllefin apo mosinformimin për atë që flet!