Në Shkollën e mësuesit pedofil/ PD publikon Letrën për ministren: Të shkarkohet drejtorja militante!

Gjimnazi “Janaq Kilica” shkolla më me traditë në Fier, e shumë pëlqyer nga nxënës dhe prindër të tyre, tashmë është kthyer në shkollën e skandaleve dhe të padrejtësive. Shkolla u bë e famshme me helmimin e nxënësve, para disa muajsh, për disa ditë rresht, duke ndërprerë mësimin dhe duke bllokuar spitalin me fëmijë të shtruar me urgjencë. Tashmë në këtë shkollë po ndodh skandali i radhës.

“Ministrja Shahini, pa pikë turpi dhe me injorancën që e karakterizon, akuzoi opozitën dhe deputetët e PD në Fier, për inskenim dhe organizim të këtyre veprimeve, na premtoi se së shpejti, hetimet do të nxirrnin në shesh, përgjegjësit, por e harroi dhe asgjë nuk na tregoi, e hëngri nga goja, turpin me bukë,” thekson Ish-Deputeti dhe Kryetari i PD Dega Fier, Luan Baçi duke shtuar se tashmë në këtë shkollë po ndodhë komedia dhe padrejtësia e radhës. “Drejtuesit e shkollës në koordinim perfekt me Drejtorinë Arsimore dhe Ministrinë e Arsimit, po bëjnë gati skenarin, për hakmarrje ndaj mësuesve, që nuk janë pjesë e rilindjes dhe që kritikojnë, dhe denoncojnë veprimet abuzive të drejtuesve.”

Kryetari i PD Dega Fier, Luan Baçi, sjellë dhe LETËR ANKESËN e mësuesve të shkollës “Janaq Kilica” drejtuar drejtuesve të arsimit, me kërkesën e tyre për ta bërë publike, pasi siç ndodh gjithmonë, pushteti i korruptuar i rilindjes, ndalon çdo publikim dhe mban në terr informativ, çdo shqetësim dhe problem, që diskrediton dhe nxjerr në pah, fytyren e vërtetë të rilindjes së Ramistëve.

“LETËR ANKESA”

ANKESË

DREJTUAR: DREJTORIT TË DREJTORISË SË PËRGJITHSHME TË ARSIMIT PARAUNIVERSITAR , TIRANË, ZOTIT SELMAN HODAJ
PËR DIJENI: MINISTRES SË ARSIMIT , ZONJA BESA SHAHINI
KRYETARIT TË KËSHILLIT TË MINISTRAVE , ZOTIT EDI RAMA

I Nderuar Zoti Hodaj,

Në Gjimnazin “Janaq Kilica” , Fier , ditën e premte , datë 5 qershor 2020, është zhvilluar një mbledhje e drejtorisë së shkollës me këshillin e mësuesve, në të cilën drejtoresha e shkollës, zonja Fereniqi Fuli u ka paraqitur mësuesve planifikimin për numrin e klasave dhe normave mësimore për vitin shkollor 2020-2021. Në parashikimin e bërë, drejtoresha komunikoi se për vitin që vjen do të ketë më pak regjistrime të nxënësve në shkollë dhe për rrjedhojë do të mbyllen disa klasa. Nisur nga kjo, drejtoresha u komunikoi mësuesve se do të niste vlerësimi i dosjeve të mësuesve për çdo ekip lëndor, si procedurë për largimin nga puna të mësuesve që dalin tepër.

Një vendim i tillë i drejtorisë së shkollës ka sjellë reagimin e mësuesve, të cilët kanë shprehur mospranimin e tyre dhe e kanë paraqitur shqetësimin në ZVAP Fier .

I nderuar Zoti Hodaj,

Ne mësuesit e Gjimnazit “Janaq Kilica” Fier , paraqesim objeksionet tona për mbylljen e klasave si më poshtë:

-Gjimnazi “Janaq Kilica” funksionon me dy godina bashkëkohore dhe ka mjedise të mjaftueshme për zhvillimin e mësimit.

-Gjimnazi “Janaq Kilica” është shkolla e mesme më me traditë në Fier, e ndodhur në qendër të Fierit, me rezultate dhe arritje të shkëlqyera ndër vite dhe si e tillë ka qenë gjithmonë e parapëlqyer prej nxënësve dhe ka pasur rritje të regjistrimeve nga viti në vit.

Ndaj, ne e gjykojmë si të qëllimshëm vendimin e zonjës Fuli për mbylljen e klasave për të larguar mësues nga puna.

Ju vëmë në dijeni se shqetësimi i paraqitur më lart është vetëm një nga problemet e shumta që ka shkolla jonë që nga moment i ardhjes së zonjës Fuli si drejtore në dhjetor 2019.

– Klima e krijuar në shkollë është jomiqësore, jobashkëpunuese.

Drejtoresha ushtron autoritetin e saj duke tejkaluar kompetencat. Nuk respekton figurën e mësuesit, përdor ironi dhe përgjigjet me cinizëm ndaj ankesave të mësuesve.

– Nuk u kthen përgjigje ankesave të bëra me gojë apo shkrim prej mësuesve.

– Bën kontrolle në orët e mësimit të papritura dhe rastësore , pa afishuar në këndin e mësuesit planifikimin e vëzhgimeve dhe grafikun përkatës.

– Vendimet që merr nuk i diskuton dhe nuk miratohen në Këshillin e Mësuesve.

– Ka detyruar zhvillimin e mësimit në klasa shumë të vogla, jashtë kritereve të përcaktuara, sepse kërkon të mbledhë gjithë shkollën në një godinë të vetme, pasi kështu mendon se e kontrollon më mirë.

– Në muajin mars 2020 në shkollën tonë pati incidente, si pasojë e të cilave u helmuan nxënës dhe mësues ; e për këto nuk u zhvillua asnjë mbledhje me Këshillin e Mësuesve për të analizuar shkaqet dhe për të marrë bashkarisht masa për mbarëvajtjen e një procesi mësimor normal. Madje, është kërkuar prej mësuesve të caktuar një mbledhje për të sqaruar situatën , por drejtoresha nuk ka pranuar.

Për sa më sipër, ne mësuesit e Gjimnazit “Janaq Kilica” kërkojmë largimin e drejtores Zonjës Fereniqi Fuli, për arsye se drejtimi i saj ka cënuar klimën e përgjithshme të komunikimit në shkollë, ka sjellë mungesë bashkëpunimi drejtues – mësues dhe ka krijuar pasiguri përmes presioneve për largime të mësuesve nga puna .

Duke shpresuar në mirëkuptimin tuaj,

Me respekt,
Mësuesit e Gjimnazit “Janaq Kilica”, Fier