Albpetrol hap ankandin e katërt, në shitje 48 mijë ton naftë

Kompania publike e nxjerrjes dhe prodhimit të naftës Albpetrol ka shpallur një ankand të ri për shitjen e 48 mijë tonëve naftë duke bërë që kjo të jetë procedura e katërt për këtë vit.

Situata me koronavirusin që ka shkaktuar një rënie drastike të çmimit në tregjet globale si dhe paralizoi ekonomitë e thuajse të gjithë vendeve kanë bërë që interesi për naftën të jetë në minimum dhe ankandet edhe në vendin tonë të mos kenë interes.  Formula e llogaritjes së çmimit në këtë procedurë është e njëjta me ankandin parardhës.

“Çmimi minimal fillestar për njësi është: 73.3 % e Çmimit Brent – 2.71 USD/bbl + K – 73.3 % është koefiçenti i cili përfaqëson karakteristikat mesatare të naftës (pesha specifike, aciditeti i naftës, % e squfurit). – Brent është çmimi në USD/bbl i Brent i Platts, i publikuar në Buletinin e Prokurimit Publik. – 2.71 USD/bbl kosto mesatare totale (transport, magazinim, stokim, analizim produkti, sigurim). – K- është vlera USD/bbl e ofruar nga ofertuesi mbi çmimin minimal të shitjes të përllogaritur nga formula (K≥0)” thuhet në dokument.

Ofertat do të mund të paraqiten deri në datë 10 korrik.  Vendndodhja e naftës sipas dokumentit është në Albpetrol sha Patos: Në pikat e lëvrimit Stacioni Usoje, Stacioni Visoke, Stacioni Gorisht, Stacioni Zharrëz, Stacioni Kuçovë. Në rast të shpalljes së një fituesi lëvrimi duhet të bëhet brenda 5 muajsh çka do të thotë që ky është afati që ka operatori fitues potencial në dispozicion për tërheqjen e naftës.

Ky është ankandi i katërt që hap për këtë vit Albpetrol për sasi naftë bruto pas atij të janarit me 31 mijë ton,  atij të marsit me 117 mijë ton dhe qershorit me 48 mijë ton të cilët dështuan  për mungesë të interesit nga ana e operatorëve.

Për herë të fundit, Albpetrol shiti naftë në një ankand në fund të majit 2019 kur u nxorën në shitje 75 mijë tonë naftë. Në atë kohë, blerja e naftës bruto u bë nga kompania “Al Global Oil” për një vlerë rreth 30 milionë dollarë./Monitor/