Lulzim Basha nuk mund të kërcënohet!

nga Agim Popoci

Pas epilogut dëshpërues të lojës me Kodin Zgjedhor nga Kryeministri Edi Rama me ndihmën e llumit opozitar, Ambasada e SHBA e bëri të qartë se Marrëveshja e 5 Qershorit duhet të miratohet pa ndryshime!

I ndodhur në befasi, Edi Rama, ndonëse filloi ta tund Kodin Zgjedhor me propozimet e Rudinës dhe Myslymit, siç e kishte menduar vetë në Surrel dhe e kishte qëndisur me gjakun e viktimave të komunizmit shqiptar, iu deshtë të shpik fajtorin pse amerikoni i kthej shpinën këtij mashtruesi, kur ai është i bindur se Marrëveshjen e 5 Qershorit nuk e bëri nul!

Duke harruar se nëpunësit që partia e tij kriminale ka në Ambasadën e SHBA nuk mund të ndikojnë tashmë në përkthimin e deklaratave dhe shkrimeve në media, Edi Rama harroi edhe faktin se dështimi i Marrëveshjes së 5 Qershorit nuk është çështje as e Partisë Demokratike dhe as Lulzim Bashës sepse ndërmjetës i Marrëveshjes është SHBA; Ndërsa, shtesat që i lançoi përmes llumit opozitar, ishin propozime që janë diskutuar në Këshillin Politik për Reformën Zgjedhore dhe sot kur Marrëveshja është firmosur nuk janë asgjë më shumë se ndërtim pa leje në Marrëveshjen e 5 Qershorit.  

“…mos thoni u prish marrëveshja, se ajo marrëveshje u bë me ju e për ju, jo për ne! Ne s’donim e s’duam administratë zgjedhore partiake, prandaj mos na provokoni se…” kërcënon shefi i Rudinës dhe Myslymit, Kryetarin e PD Lulzim Basha, duke ngatërruar epokën, vartësit, dhe ata që kanë detyrime ndaj tij, jo vetëm pse është Kryeministër.

Pas 17 Majit të vitit 2017, Edi Rama mund t’ia përsëriste Lulzim Bashës togfjalëshin “…mos na provokoni se…” për rrethana të ndryshme para dhe postzgjedhore; Por, sot, Edi Rama mund të kërcënoj vetëm llumin opozitar ose individ të caktuar të këtij llumi që kanë detyrime ndaj Kryeministrit, si për shpirtin e shitur në diktaturë ashtu dhe në tranzicion, ose futjen e këmbëve në një këpucë për shkak të detyrimeve ndaj shtetit ose problemeve me shëndetin.

Dhe, sot, kur ka një Vendim të Kryesisë së Partisë Demokratike dhe ka filluar procesi mbi përzgjedhjen e kandidatëve për deputetë dhe kryetarë të bashkive, ku çdo anëtar ka të drejtën të propozojë një kandidat, Edi Rama nuk e kërcënon dot Lulzim Bashën.

Edi Rama me ndihmën e llumit opozitar mund të shkaktoj rrëmuja nga më  të ndryshmet në takimet e përzgjedhjes së kandidatëve për deputetë dhe kryetarë të bashkive që po zhvillohen nëpër Degët e Partisë Demokratike, por asnjëri nga llumi dhe as shefi i tyre, nuk mund të ndalojnë procesin më demokratik që ka filluar në PD dhe politikën shqiptare në tërësi.

Përmes mediave që ka në shërbim Edi Rama, me llumin opozitar edhe mund të bëjnë diversion duke lançuar kthimin e ca figurave kriminale në Partinë Demokratike, sot kur dihet që i kanë shërbyer Serbisë dhe Greqisë në vitin e përgjakshëm 1997, por për asgjë në botë nuk mund ta kërcënojnë Kryetarin e PD, Lulzim Basha.   

Kryetari i Partisë Socialiste me llumin opozitar edhe mund ta ndalojnë për ca çaste ingranazhin e procesit të përzgjedhjes së kandidatëve për deputetë dhe kryetarë të bashkive në Partinë Demokratike, qoftë dhe duke shantazhuar figura të njohura publike dhe në fushën e biznesit të afërta me PD, por nuk e kërcënojnë dot Kryetarin e Partisë Demokratike, Lulzim Basha.

Edi Rama mund ta kërcënoj Kryetarin e Partisë Demokratike, Lulzim Basha, me rezultatin e përçudnuar të procesit të përzgjedhjes së kandidatëve për deputetë dhe kryetarë të bashkive, ku çdo anëtar ka të drejtën të propozojë një kandidat; Dhe, duke ndodhë çudia, mund të ndodhë edhe epilogu me një listë të përçudnuar për shkak të zbatimit të demokracisë deri në këto nivele! Por, ky nuk mund të quhet dështim i Lulzim Bashës, por i një trupi të tërë organizativ i cili aktualisht është i ndërgjegjshëm se rrezikohet vetëm nga intriga e veshur me paranë e Edi Ramës dhe llumit opozitar; Para, që shkatërroi zgjedhjet e vitit 2017 dhe së fundi edhe listën e dalë nga këto zgjedhje.   

Në fund, në pamundësi për të kërcënuar Kryetarin e Partisë Demokratike, Lulzim Basha, dhe duke mos përfillur Shtetet e Bashkuara si garant i Marrëveshjes së 5 Qershorit, Kryeministri Edi Rama edhe mund ta miratoi Kodin Zgjedhor siç e ka ideuar me llumin opozitar, por nuk mund të bindë asnjë shqiptarë në këtë tokë, se me këtë llum do ta nxjerr Shqipërinë nga kriza, aty ku e kanë futur bandat e tij komuniste me hashash dhe PPP.

Me lista të hapura apo të mbyllura, me pragun 5 ose 2 për qind, administratë politike ose jo, pak rëndësi ka, Edvin Kristaq Rama me llumin opozitar i ka të humbura zgjedhjet. Këtë ka kohë që e kanë të qartë edhe bashkëpunëtorët e tij të ngushtë që janë ngopur me paratë e krimit. Por, kjo bindje, sot u është betonuar me mostra politike që shohin në parlament, arsye kjo për të cilën dhe mirëkuptojnë bossin!

Nuk është e lehtë të kesh në krah Rudinën dhe Myslymin…