Shqipëria po tkurret, Ilir Meta po krihet!
nga Agim Popoci
Sot Presidenti i Republikës u zgjua i trishtuar pasi kuptoi se studimi i “The Economist” parashikonte që në vitin 2100, popullsia e Shqipërisë do të jetë vetëm 860 mijë banorë.
“Shpejtësia e plakjes është gjithashtu tronditëse: mosha mesatare sivjet është 37.2 vjeç, por pas 10 vjetësh parashikohet të rritet në 42.1 vjeç. Trishtim më të madh nuk mund të ketë!”
Shifrat vërtetë janë tronditëse por nuk është ky trishtimi më i madh!
Trishtimi më i madh është se njeriu që i bëri shqiptarët të ikin nga ky vend, i cili, siç thotë Ilir Meta, e ka bekuar Zoti me bukuri të jashtëzakonshme dhe pasuri natyrore që jo shumë vende në botë i kanë, sot është President.
12 vjet në Qeveri Shqiptare, Ministër, Zv/Kryeministër dhe Kryeministër dhe Ilir Meta flet për planin afatshkurtër të qeverive që mund të përfitojnë nga emigrimi, pasi kështu ulen fiktivisht treguesit e papunësisë apo mund të rriten të ardhurat nga remitancat.
Shqiptarët nuk e kanë menduar dhe nuk çajnë kokën nëse me ikjen e tyre mund të përfitojnë qeveritë në çfarëd lloj mënyre, por shqiptarët po ikin se e panë ’97-në që risolli mjerimin me partinë komuniste të Ilir Metës në pushtet.
Trishtim i madh është se në këtë Shqipëri asgjë nuk ndryshoi edhe kur një i ri si Ilir Meta u bë Kryeministër; Madje vuajtjet e shqiptarëve u shtuan ndërsa u rikthyen tortuart. Dhe jo vetëm kaq!
Nga një Shqipëri që po ndërtonte shoqëri me media, shqiptarët arritën të shohin për një kohë shumë të shkurtër, media pa shoqëri! Dhe kjo fal Ilir Metës! Me lekë dhe torturë të gjithëve iu mbyll goja, dhe revolucioni i vetëm në kohën kur Kryeministër ishte Ilir Meta ishte se votat më nuk vidheshin! S’kishte nevojë, PS i blinte komisionerët!
Konflikti brenda partisë kriminale, PS, nuk solli asgjë të re edhe kur Ilir Meta u largua prej saj dhe krijoi LSI sh.a. Si e tillë nuk arriti të inkorporohej në sistemin politik ama arriti të futet në pushtet, në koalicion me PD-në!
Për të gjithë ata që menduan se Ilir Meta u kthye në normalitet, ishte një mashtrim i rëndë. Ishte po ai Ilir Meta i PS-së së Ramiz Alisë, pjesëmarrës në krim por jo dhe përgjegjës. Kjo u pa kur me zë dhe figurë u konfirmuan bëmat e LSI sh.a. dhe shefit të saj, por shqiptarët nuk arritën të shohin as përgjegjës para drejtësisë dhe as një kërkimfalje për prezencën e malit me para para Zv/Kryeministrit të kohës; Madje kërkimfalja nuk u pa edhe kur e gjitha përfundoi me kryengritjen e përgjakshme të 21 Janarit ama shqiptarët dëgjuan për ca kokëpalarë i vunë flakën shtetit!
Ata që kishin vazhduar të besojnë se Shqipërinë e ka bekuar Zoti edhe pas viteve 1991, 1997 dhe 2001, ishte 21 Janari i vitit 2011 që u ndezi llambën të fillojnë të bëjnë gati valixhet. Shumë prej tyre kishin të drejtë, dhe sot japin leksione demokracie të atyre që nuk u bindën, sepse shumë shpejtë erdhi viti i trishtë 2013 kur Ilir Meta dhe LSI sh.a. arritën marrëveshje me kokëpalarët dhe sollën Edi Ramën në pushtet.
Eksodi që pasoi me ardhjen e dyshes kriminale Meta-Rama në pushtet nuk ka nevojë për shifrat e “The Economist” ndërsa Ilir Meta e ka vështirë ta konstatojë këtë mjerim me Shqipërinë bosh pasi ngeli nëpër malet shqiptare, që shumë kohë më parë janë braktisur. Dhe, kur i rastis që të zbres nga mali në qytet, arrin të mbush sheshin me opozitarë të pakorrigjueshëm që duke protestuar kundër një Kryeministri komunist, harrojnë se artistin që kanë përballë, është komunist i klasit të parë dhe njëri nga fajtorët kryesor për mjerimin që ka pushtuar Shqipërinë.
Sot, kur Shqipëria është braktisur dhe mosha mesatare e atyre që nuk kanë ikur është 37.2 vjeç, dhe pas 10 vjetësh parashikohet të rritet në 42.1 vjeç, Ilir Meta thotë se është tani koha për të rikthyer shpresën dhe besimin se Shqipëria ka diell për të gjithë dhe jo vetëm për disa.
Sot thotë Ilir Meta është koha që shqiponjat të kthehen në folenë e tyre!
Po, Shqipëria po tkurret, por s’ka pse krihet Ilir Meta duke e parë veten në pasqyrën e LSI-së, e cila vazhdon dhe i thotë: Ti je më i miri në botë!
Për të rikthyer shpresën dhe besimin tek shqiptarët është vetëm një rrugë, të ikë vetë Ilir Meta një orë e më parë, si njëri ndër shkaktarët e kësaj gjendje, dhe të marrë për dore atë që u dha shqiptarëve peshqesh në vitin 2013, Edi Ramën.
Po si do të kthehen shqiponjat në folenë e tyre?! Fare lehtë! Tashmë është koha që shqiponja të zbres nga shuplakat e Ilir Metës ku përfundoi dhunshëm, me hapjen e betejës për mbrojtjen e fronit presidencial, dhe të kthehet aty ku i takon, në folenë e vet.
Foleja e shqipes vërtetë u shkatërrua nga Edi Rama me ndihmën e Ilir Metës, por gjithashtu është e vërtetë se ajo do të ndriçoj vetëm kur të largohen ata që e shkatërruan: Kryeministri Edi Rama dhe Presidenti Ilir Meta!
