Ambasadori i Izraelit në Beograd: Kosovën e kemi njohur më 4 Shtator, këtë realitet s’e ndryshon Vuçiç!

“Nuk shtrohet më pyetja nëse Izraeli do ta pranoj Kosovën ose jo, sepse Izraeli e ka pranuar Kosovën më 4 Shtator, e tani mbetet të shohim se në çfarë mënyre nuk duhet të lejojmë që kjo të ndikoj në marrëdhëniet në mes të Serbisë dhe Izraelit,” tha Ambasadori i ri i Izraelit në Serbi, Jahel Vilan.

“Izraeli nuk ka firmosur asgjë në Washington, ne nuk ishim pjesë e këtij Samiti. Marrëveshja u firmos nga Kryeministri i Kosovës, Avdullah Hoti dhe Presidenti i Shteteve të Bashkuara. Kryeministri ynë Benjamin Netanyahu ka përshëndetur njohjen e ndërsjellë të Izraelit dhe Kosovës,” tha Ambasadori Jahel Vilan për televizionin serb TV N1duke sqaruar njëherë e mirë nëse Izraeli e ka pranuar shtetin e Kosovës dhe nëse kjo njohje do të ndikon në marrëdhëniet në mes të Jerusalemit dhe Beogradit.

I pyetur se si e ka komentuar Presidenti i Serbisë, Aleksandar Vuçiç, njohjen e Kosovës me rastin e inaugurimit të tij si Ambasador, ai tha se në takim është biseduar për përmirësimin e marrëdhënieve në mes të dy vendeve dhe nuk ka lidhje nëse Vuçiç është i kënaqur  ose nuk e mbështetë këtë njohje.

“Izraeli është shtet sovran dhe ky është vendimi ynë. Marrëveshja është nënshkruar, dhe këtë realitet nuk mund ta ndryshojmë Unë ose Vuçiç. Ne duhet të punojmë për përmirësimin e marrëdhënieve, dhe jo të merremi për diçka që është kryer para dy javë e gjysmë në Washington,” ishte i prerë ambasadori izraelit.

Vendimin e shtetit serb për ta transferuar Ambasadën në Jerusalem, Ambasadori i ri i Izraelit në Serbi, Jahel Vilan, e konsideron një çështje të rëndësishme dhe pret që çdo shtet ta ketë ambasadën në kryeqytetin izraelit

“Vendimi, që Serbia të jetë vendi i parë evropian i cili do të transferoj ambasadën në Jerusalem, nuk duhet të ishte ndonjë lajm. Çdo shtet duhet ta ketë ambasadën në kryeqytet. Kjo për ne është një çështje e rëndësishme.”