Pandemia, goditje të rëndë transportit në det, tokë dhe ajër

Pandemia COVID-19, ndër të tjera goditi rëndë sektorin e transportit. Muajt e bllokimit në tremujorin e dytë dhe më pas zbehja e tregtisë pas heqjes së masave e kanë mbajtur në presion transportin e mallrave dhe pasagjerëve me jashtë vendit përgjatë 8 muajve të parë të vitit.

Sipas të dhënave të INSTAT përgjatë periudhës janar-gusht 2020, volumi i mallrave të ngarkuara/shkarkuara në porte është 2.728 mijë tonë, duke u ulur me 9,7 %, krahasuar me 8-mujorin e 2019.

Volumi i mallrave të transportuar me hekurudhë është 16.333 mijë tonë-kilometër, duke u ulur me 39,9 %, krahasuar me 8-mujorin e 2019.

Rënia ka vijuar edhe për muajin gusht. Volumi i mallrave të përpunuara në porte në muajin gusht 2020 është 318 mijë tonë, duke u ulur 16,4 %, krahasuar me gusht 2019. Ndërsa volumi i mallrave të transportuara me hekurudhë është 2.027 mijë tonë-kilometër, duke u ulur me 51,1 %, krahasuar me gusht 2019. Numri i fluturimeve të kryera, në gusht 2020 është 2.278 duke shënuar një rënie me 27,9 %, ndaj Gusht 2019.

Rënie pati edhe në transportin e pasagjerëve, e cili vijoi për të gjithë periudhën.  Numri i pasagjerëve që udhëtojnë me linjë detare në gusht 2020 është 61.814. krahasuar me Gusht 2019, ky tregues është ulur 86,1 %.

Në 8-mujorin e 2020, kanë udhëtuar me linjë detare 267.565 pasagjerë, duke u ulur me 77,0 %, krahasuar me të njëjtën periudhë të vitit 2019.

Në muajin gusht 2020, transporti ajror i pasagjerëve zë 74,3 % të transportit gjithsej. Numri i pasagjerëve që kanë udhëtuar me linja ajrore, në tetëmujorin e 2020 është 915.646 pasagjerë duke u ulur me 58,8 %, krahasuar me tetëmujorin e 2019.

Në tetëmujorin e 2020, mallrat e eksportuara me det zënë 56,0 %, me rrugë 42,1 % dhe me ajër 0,4 %. Në tetëmujorin e vitit 2020, mallrat e eksportuara me rrugë janë ulur 9,3 %, krahasuar me të njëjtën periudhë të vitit 2019.

Në tetëmujori mallrat e importuara me det zënë 47,5 %, me rrugë 46,7 % dhe me ajër 2,9 %. Në tetëmujorin e 2020, mallrat e importuara me rrugë janë ulur me 5,2 %, krahasuar me të njëjtën periudhë të vitit 2019./Monitor/