Zaev e Dimitrov kundër Ivanovit: Askush nuk mund të pengojë të ardhmen e Maqedonisë

Pasi kryeministri i Maqedonisë, Zoran Zaev dhe ministri i Punëve të Jashtme Nikolla Dimitrov zhvilluan një takim me presidentin Gjorge Ivanov ku i dorëzuan  marrëveshjen për zgjidhjen e kontestit të emrit, Zyra e shtypit pranë Qeverisë bëri të ditur për incidentin i cili ndodhi në Presidencë.

“Kryeministri Zaev dhe ministri Dimitrov, bënë një përpjekje konstruktive për prezantimin dhe për diskutimin e përmbajtjes së marrëveshjes, por presidenti Ivanov e ndërpreu takimin dhe u largua duke refuzuar që të bisedojë për përfitimet e kësaj marrëveshje historike për të ardhmen e Maqedonisë,” thekson Qeveria e Maqedonisë duke i bërë thirrje të gjithë faktorëve politikë që të bashkohen rreth prioriteteve kombëtare dhe t’i japin përkrahje prosperitetit të qytetarëve dhe hyrjes së Maqeonisë në NATO dhe në BE.

“Qytetarët përfundimisht kanë mundësinë që të shkruajnë një kapitull të ri në historinë e vendit tonë dhe askush nuk ka të drejtë t’i pengojë që të marrin vendimin e duhur për të ardhmen e Maqedonisë”, thekson në njoftimin e saj, Qeveria e Maqedonisë.