Ambasadorja e SHBA vizitë në KMSH: Ju keni treguar se islami është burim paqeje!
Kryetari i Komunitetit Mysliman të Shqipërisë, H.Bujar Spahiu, sot në takim Ambasadoren e Shteteve të Bashkuara të Amerikës në Shqipëri, Yuri Kim e njohu mbi kontributin konkret që jep KMSH në mbarëvajtjen e jetës fetare, sigurisë, dialogut dhe paqes sociale në shoqëri, si komuniteti më i madh fetar në vend.
“Ne jemi të fokusuar te përçimi i mesazhit të paqes dhe harmonisë në shoqëri. Inspirimi ynë për të qenë faktor ndikues në stabilitetin dhe harmoninë sociale në vend buron nga Kurani dhe Tradita Profetike,” tha H.Bujar Spahiu duke sjellë në vëmendje edhe shembullin e institucioneve arsimore të Komunitetit Mysliman si medresetë dhe Kolegjin Universitar “BEDER”, që kanë dhënë dhe japin kontributin e jashtëzakonshëm në përçimin e dijes ndër breza.
Ambasadorja Yuri Kim nga ana e saj shprehu vlerësimin maksimal për lidershipin që ka treguar Komuniteti Mysliman i Shqipërisë në mbajtjen larg të institucionit nga influenca, të cilat bien ndesh me misionin hyjnor të islamit si fe e paqes dhe harmonisë.
“Ju keni treguar se islami është burim paqeje,” tha Ambasadorja Yuri Kim duke falënderuar Kryetarin e KMSH dhe institucionin që ai drejton për bashkëpunimin konkret në luftën kundër radikalizmit dhe ekstremizmit të dhunshëm ndërsa garantoi mbështetjen e saj personale, dhe të shtetit të cilin përfaqëson, ndaj institucionit të Komunitetit Mysliman të Shqipërisë, thekson KMSH përmes një njoftimi pas takimit.
Ndryshe, Ambasadorja Yuri Kim ishte e shoqëruar nga Oficeri për të Drejtat e Njeriut pranë Ambasadës së SHBA, Ian Crawford, ndërkohë në në takim ishin edhe Kancelari i KMSH, Ylli Cikalleshi dhe Drejtori i Mardhënieve me Jashtë, Fejzi Shaholli.
