Shteti i nëpërkëmbur i Kosovës në Hagë!

nga Agim Popoci

Arrestimi  nga Gjykata Speciale i Presidentit të Kosovës në detyrë, Hashim Thaçi, së bashku me krerët tjerë të Shtabit të Përgjithshëm të UÇK-së, nga protagonistët politik dhe mediat që kanë në shërbim, u mundua të relativizohet si një çështje që i takon individëve dhe jo Ushtrisë Çlirimtare të Kosovës!

Pavarësisht reagimeve banale të disa qytetarëve që sot gëzojnë lirinë në Kosovë dhe gëzohen për arrestimin e tyre, ata së pari duhet ta dijnë se Gjykata Speciale nuk përdhosi individin por shtetin e Kosovës. Presidenti i Kosovës, Hashim Thaçi, nuk piku nga qielli por u zgjodh përmes zgjedhjeve, në të cilën morën pjesë qytetarët e Kosovës.

Dhe, ata që sot ekzaltohen për arrestimin e Hashim Thaçit, Jakup Krasniqit, Kadri Veselit dhe Rexhep Selimit, dhe i akuzojnë për vrasës dhe hajdut që përfituan në kurriz të qytetarëve të Kosovës, kishin rastin për 21 vjet ti drejtohen gjykatave kosovare. Përderisa nuk e kanë bërë një gjë të tillë, dhe i lanë të votohen si të përzgjedhurit e popullit, më e pakta që mund të bëjnë sot është, të heshtin.

Fillimisht për Presidentin e Kosovës, Hashim Thaçi! Në konfliktin Kosovë-Serbi, Kosova ishte palë që mbronte pragun e shtëpisë ndërsa agresori ishte Serbia. Me përfundimin e kësaj lufte,  Shtabi i Shtetit të Serbisë nuk arrestua dhe nuk u dërgua në Hagë edhe pse krimet serbe të luftës u bënë sheshit pa ndonjë sofistikim, duke mos tradhtuar traditën kriminale të ushtrisë serbe që nga themelimi. Pas përfundimit të mandatit në postet përkatëse, Gjykata për Krime Lufte në Ish-Jugosllavi me seli në Hagë, me presionet e shumta politike arriti të bindë shtetin serb që të ekstradoj protagonistët politik të akuzuar për krime lufte edhe pse u shitën si “dorëzime”; Me përjashtimin e vetëm, i prangosur u dërgua Ish-Presidenti i Jugosllavisë, Sllobodan Millosheviç.

Si u trajtuan nga populli dhe shteti serb, të akuzuarit nga Gjykata e Hagës ndoshta dhe nuk ia vlen për paralelizëm me rastin kosovar sepse kemi të bëjmë me një popull absolutisht kriminal, por nuk duhet neglizhuar faktin që të gjithë zyrtarët serbë të akuzuar për krime lufte në Kosovë, janë ndër personat më të pasur në Serbi dhe që përfituan nga të qenurit  në pushtet gjatë periudhës së luftës së Kosovës.

Mirëpo, jo vetëm në Serbi por në asnjërën nga republikat ish-jugosllave, nuk arrestua asnjë zyrtar para se ta përfundonte mandatin, si të zgjedhur ose jo nga populli.

Pse ndodhi kjo në Kosovë, shqiptarët mund ta gjejnë përgjigjen në pasqyrë!

Situata rëndohet edhe më shumë kur tashmë të arrestuarit nga Gjykata Speciale, të dehur nga pushteti nuk reaguan për Shtëpinë e Verdhë edhe kur u terrorizua Familja Katuçi dhe Kryeministrit të Kosovës në atë kohë, Hashim Thaçi, iu servirën dhe fakte që dëshmonin mbi tendencat serbe, që u rritën nga propaganda në Rezolutë të Këshillit të Evropës për të krijuar në fund dhe Gjykatën Speciale.

Mirë Hashimi me shokë ishte i babëzitur nga pushteti, po ku ishin të përzgjedhurit e tyre e madje edhe rivalët politik, që gëlltitën akuzën serbe për trafik organesh dhe sot lumturohen në rrjetet sociale se iu arrestua Presidenti i shtetit të tyre!   

Arrestimi i Hashim Thaçit nuk është arrestim i një individi por i Presidentit në detyrë, i cili nuk dha dorëheqje nga hajduti dhe vrasësi për të udhëtuar drejtë Hagës, por nga kreu i shtetit të Kosovës, i cili u nëpërkëmbë edhe nga Gjykata Speciale e cila u votua nga vetë ai dhe të përzgjedhurit e popullit.

Të gjithë ata që ishin të lumtur, me të drejtë, kur UÇK arrestonte ndonjë bashkëpunëtor të Serbisë, sot ose të turpërohen dhe të nisen drejtë Hagës si bashkëpunëtor në krim, ose të rrinë ballëhapur se një herë në histori kishin një ushtri që quhej Ushtria Çlirimtare e Kosovës, që kontribuoi në çlirimin e tokës shqiptare. Jo sot, por kurrë nga asnjë gjykatë, UÇK nuk mund të akuzohet për krime lufte, dhe mjafton fakti i vetëm se luftonte në pragun e shtëpisë ndërsa po sulmohej nga shkijet!

Të gjithë ata që duartrokasin Gjykatën Speciale duhet ta kenë të qartë se ajo u krijua për të dënuar krimet e luftës së UÇK dhe për të mbyllur sytë për krimet serbe në Kosovë. Dick Marty nuk ishte i shqetësuar dhe nuk është, pse shqiptarët u vranë në mes vete në luftën ku agresor ishte Serbia, por “hetoi” trafikun e organeve nga Ushtria Çlirimtare e Kosovës duke shpikur Shtëpinë e Verdhë në Gurrë të Burrelit edhe pse këmba e UÇK-së atje nuk ka shkelur kurrë.

Edhe pse vullneti politik dhe ai popullor ka munguar në zbardhjen e ekzekutimit të rivalëve politik, që pretendohet se janë urdhëruar nga krerët e UÇK-së, por shqiptarët duhet ta kuptojnë se Gjykata Speciale deri më sot nuk e ndjekë gjurmën e këtij krimi. Aktakuza e publikuar nuk ia arsyeton asnjërën nga sjelljet e Gjykatës dhe Prokurorisë Speciale deri më sot. Drejtësia Ndërkombëtare dhe as ajo Vendore nuk njehë raste kur dikush arrestohet i akuzuar për krim, dhe nesër i kërkohet prova në shtëpi.

Nëse kjo Gjykatë mendon se kësaj drame kosovare i duhet dhe spektakli, duhet të vetëkorrigjohet sepse për këtë po kujdeset vetë populli i Kosovës që po realizon tragjikomedinë më të pështirë që mund ta bëjë një popull ndaj institucioneve të veta shtetërore; Për të cilën, edhe historia do ta thotë në fund, se shteti i Kosovës u nëpërkëmbë nga të gjithë, dhe nga Gjykata Speciale të cilën e sponsorizoi dhe krijoi shteti i Serbisë ndonëse u votua nga Parlamenti i Kosovës.

Në fund, të gjithë ata që mendojnë se lufta çlirimtare në Kosovë mund të pastrohet me vendimet e Gjykatës Speciale, dhe se Evropa është e shqetësuar shumë për krimet ndërshqiptare dhe ka për qëllim ta çoj drejtësinë në vend, gabohen rëndë. Në momentin kur do të arrijë ta barazoj fajin shqiptar me atë serb, kosovarët duhet të jenë të bindur se Gjykata Speciale nuk do ti hyj më njeriu në punë dhe do të pushoj së ekzistuari. Në atë moment, Kosova do të ketë dhe një lidership të ri meqë popullin që harron shpejtë, e kishte dhe e ka aty, ulur këmbëkryq!