Mali Zi, pronarët e Bar-Restoranteve kundër masave: Të enjten fillojmë punë!

Shoqata e Hotelierëve të Malit Zi ka bërë të ditur se për ta masat e Trupës Koordinuese Kombëtare, NKT, duke filluar prej sot nuk vlejnë dhe se do të hapin bar-restorantet të enjten në gjithë vendin.

“Edhe pse si hotelier jemi munduar të respektojmë të gjitha masat e propozuara, duke filluar prej sot vendimet e NKT-a nuk vlejnë. Aq më shumë kur autoritetet shtetërore injorojnë ose nuk sanksionojnë ata që në objektet fetare, në hapsirat publike e madje edhe në spitalet covid kërcënojnë shëndetin e qytetarëve. Për këtë arsye kemi marrë vendim që në nivel vendi, të injorojmë të ashtuquajturit semafor dhe nga e dita e enjte të fillojmë të punojmë normalisht, në përputhje me rekomandimet e mëparshme për të cilat mendojmë se janë logjike,” thuhet në komunikatën e Shoqatës së Hotelierëve të Malit Zi.

Bar-Restorantet, sipas tyre, do të punojnë deri në orën 22:00, në një tavolinë maksimalisht do të mund të ulen 4 persona si jashtë ashtu dhe brenda në një distancë prej 2 metrave.

Në fund, pronarët e Bar-Restoranteve theksojnë se kjo është mënyra e vetme që të ruajnë ekzistencën e tyre dhe të garantojnë ekzistencën e familjeve të veta.