Dita e Flamurit/ Urimi, Basha: 28 nëntori tjetër do të na gjejë me Shqipëri më të shëndetshme!

Pas homazheve për të rënët për lirinë e atdheut, Kryetari i Partisë Demokratike, Lulzim Basha, dha një urim ndryshe nga vitet tjera sot kur shqiptarët po përballen me sfidën e tejkalimit të pandemisë e cila na ka marrë qindra bashkëqytetarë duke lënduar shumë familje ndërkohë që mijëra të tjerë po vuajnë pasojat shëndetësore dhe shumë më shumë pasojat ekonomike dhe sociale të pandemisë.

“Sot në Ditën e Pavarësisë dhe Festës së Flamurit dua t’iu uroj gjithë qytetarëve dhe bashkëkombasve të mi kudo ku janë gëzuar festën më madhështore të kombit tonë. Sot kujtojmë me nderim dhe përkulemi me nderim përpara veprës dhe sakrificës të të gjithë bijve dhe bijave të kombit tonë që sakrifikuan gjithçka në altarin e lirisë dhe pavarësisë kombëtare.”

Sot është një ditë feste dhe gëzimi, tha Lulzim Basha në urimin e tij, dhe na gjen ndryshe nga çdo vit tjetër.

“Shqipëria dhe shqiptarët po përballen me sfidën e tejkalimit të pandemisë e cila na ka marrë qindra bashkëqytetarë duke lënduar shumë familje ndërkohë që mijëra të tjerë po vuajnë pasojat shëndetësore dhe shumë më shumë pasojat ekonomike dhe sociale të pandemisë. Në këto kushte kjo ditë dhe kjo festë është një kujtesë e fuqisë dhe forcës së kombit tonë.”

I bindur në fuqinë dhe forcën e qytetarëve shqiptarë, për të tejkaluar së bashku pasojat e kësaj krize dhe pandemie dhe për të dalë më të fortë, më të bashkuar dhe më të vendosur, Kryetari i Partisë Demokratike, Lulzim Basha, është i bindur se 28 Nëntori i vitit 2021 do ta gjejë Shqipërinë më afër Evropës:

“Jam i bindur se 28 nëntori tjetër do të na gjejë me një Shqipëri më të shëndetshme, më të mirë dhe më afër Europës. Ju uroj nga zemra ditën e Pavarësisë, gëzuar Ditën e Flamurit!”