Komiteti i Ekspertëve: Masat Anticovid vazhdojnë pa afat, s’ka mbyllje për fundjavë!

Komiteti Teknik i Ekspertëve ka vendosur sot të lërë në fuqi masat kundër përhapjes së koronavirusit që ishin të vlefshme deri më sot, 2 Dhjetor.

Pas takimit të Komitetit Teknik të Ekspertëve, Zv/ministrja e Shëndetësisë, Mira Rakacolli, tha se do të vijon ora policore 22:00 me 06:00, ndalimi i grumbullimeve, tubimeve e mitingjeve politike, ceremonive festive dhe atyre mortore; Masa këto që do të vijojnë për një periudhë pa afat.

“Komiteti i Ekspertëve mori vendimin unanim për t’i vijuar këto masa. Ndalohen tubimet, konferencat, ceremonitë e festave dhe ato mortore. Do vazhdojë të jetë në fuqi kufizimi i lëvizjes së qytetarëve nga ora 22:00 deri në orën 06:00. Do të kufizohet në këto orare edhe puna në Fast-Food. Universitetet do të vazhdojnë online, administrata do të punojë online, ndërsa shkollat me mësim të alternuar. Këto masa do të vijojnë për një periudhë pa afat,” tha Zv/ministrja e Shëndetësisë, Mira Rakacolli.

Me këtë rast Komiteti Ekspertëve mohoi se i ka sugjeruar Kryeministrit Edi Rama një mbyllje ndërsa lidhur me mbylljen e përfolur për këtë fundjavë Komiteti sqaroi:

“Në vendimin e sotëm nuk është përmendur kjo. Në vendimi e sotëm mbeten këto që thamë. Nëse do të kemi një rëndim të situatës, masat mund të jenë këto, por edhe të tjera. Por kjo masë nuk është diskutuar dhe në situatën ku jemi nuk është as e justifikuar.”