Protesta në Mal të Zi kundër ndryshimit të Ligjit për Liritë Fetare

Mbështetës të opozitës malazeze u mblodhën sot para Parlamentit të Malit të Zi në Podgoricë, për të protestuar kundër ndryshimeve të paralajmëruara të Ligjit për Liritë Fetare.

Protesta që nisi në orën 12:00, nuk u raportua në polici dhe, për momentin, nuk ka organizatorë.

Pjesëmarrësit me flamujt e Malit të Zi në duar, u tubuan nga disa qytete duke kundërshtuar ndryshimet e hartuara nga Qeveria e re malazeze, me kërkesë të Kishës Ortodokse Serbe..

“Nuk e japim shtetin”, “Çetnikë”, “Kjo nuk është Serbi” ishin disa nga parullat e protestuesve.

Gjithashtu, nga protestuesit u dëgjuan edhe sharje në drejtim të shumicës së re parlamenatre dhe zëvendëskryeministrit, Dritan Abazoviç, partia e të cilit tha se do t’i mbështesë ndryshimet në Ligjin për Liritë Fetare.

Në një moment, anëtarët e Partisë Demokratike të Socialistëve, e cila është në opozitë, dhe ish-kryeministri Dushko Markoviç kanë dalë para godinës së Parlamentit dhe janë përshëndetur nga të tubuarit.

Komisioni për të Drejtat dhe Liritë e Njeriut i Parlamentit të Malit të Zi do të diskutoj ndryshimet e ligjit dhe ato ndryshime më pas do të dalin në seancë plenare.

Ligji për Liritë Fetare është miratuar nga Qeveria e kaluar, e udhëhequr nga Markoviç, në fund të vitit 2019. Me këtë ligj, objektet dhe tokat fetare që kanë qenë të shtetit deri në vitin 1918, do t’i kalojnë shtetit nëse nuk ka prova se ato janë fetare.

Që nga miratimi i këtij ligji, raporton RFE, Kisha Ortodokse Serbe dhe opozita e atëhershme kanë organizuar protesta, të cilat kanë rezultuar edhe me ndryshim të Qeverisë malazeze.

Kisha thotë se me këtë ligj, shteti dëshiron t’ia marrë pronën.