Liderët e BE: Kufijtë ngelen të hapur, kufizohen udhëtimet turistike!

Liderët e Bashkimit Europain kanë vendosur që kufijtë e brendshëm të BE të mbesin të hapur, por ranë dakord që sa më shumë që është e mundur të kufizohen udhëtimet që mund të quhen turizëm, ose nuk janë të rëndësishme.

Në video-konferencën e liderëve të Bashkimit Europian ku u shqyrtuan hapat e mëtejmë në luftën kundër koronavirusit, çështja kryesore ishte përshpejtimi i procesit të vaksinimit dhe si të arrihet deri në verën e këtij viti, vaksinimi i 70 për qind të popullsisë në BE, dhe vaksinimi i 80 për qind të atyre që janë mbi 80 vjeç.

Meqë kjo varet nga vaksinat e miratuara që do të jenë në dispozicion, që për momentin janë vetëm dy dhe pritet miratimi i vaksinës së tretë nga EMA, shtetet anëtare kanë shqyrtuar mundësinë e përshpejtimit të prodhimit dhe furnizimit me vaksina.

Frika nga përhapja e varianteve të reja të koronavirusit ishte shkaku që disa shtete propozuan masa më të ashpra, madje dhe mbylljen e kufijve të brendshëm të Bashkimit Europian për të gjitha udhëtimet që nuk janë me rëndësi thelbësore.

Ky vendim nuk u miratua, por liderët e shteteve anëtare ranë dakord që sa më shumë të kufizohen udhëtimet që mund të quhen turizëm, ose udhëtimet që nuk janë të rëndësishme.

Gjithashtu, liderët e BE diskutuan edhe për solidaritetin me fqinjët dhe si ti dërgohen vaksina shteteve fqinje, siç janë ato të Ballkani Perëndimor.

“Pasaporta e imunitetit”

Liderët e Bashkimit Europian erdhën në përfundimin se nuk është momenti që të mendohet për futjen e “pasaportave të imunitetit”. Por, ishin dakord që mund të arrihet një marrëveshje për çertifikata vaksinimi si dokumente mjekësore, por jo dhe dokumenta udhëtimi.

Kjo u konsiderua si një ide kontroverse meqë ende nuk dihet nëse njerëzit që janë të vaksinuar nuk mund të transmetojnë virus si dhe për faktin se vaksina nuk është në dispozicion për të gjithë ata qytetarë që janë të interesuar të vaksinohen.

Sidoqoftë, kjo ide nuk është përjashtuar se mund të shqyrtohet më vonë, për të cilën këmbëngulnin vendet turistike si Greqia, Spanja dhe Portugalia, të cilat mendojnë se me çertifikata të tilla mund të lehtësohet udhëtimi brenda për brenda Bashkimit Europian.