Sot Kosova voton!

Sot Kosova voton për Parlamentin e ri! Duke filluar nga ora 7:00, 1.794.862 qytetarë me të drejt vote, në 888 Qendra të Votimit me gjithsej 2.382 vendvotime do të kenë mundësi të ushtrojnë të drejtën e tyre kushtetuese në zgjedhjet e parakohshme parlamentare, deri në orën 19:00 kur dhe do të mbyllen vendvotimet.

Komisioni Qendror i Zgjedhjeve ka paralajmëruar se do të mbajë 4 konferenca për media ku do të publikohen rezultatet ndërsa rezultatet paraprake të zgjedhjeve parlamentare të 14 shkurtit do të publikohen rreth orës 22:00.

Ndërkohë do të jenë 2.000 vëzhgues më pak të angazhuar për monitorim të zgjedhjeve në krahasim me zgjedhjet e vitit 2019, për shkak edhe të pandemisë COVID-19.

Florent Spahija nga koalicioni i organizatave joqeveritare që monitorojnë procesin zgjedhor Demokracia në Veprim tha se vetëm 500 vëzhgues do të monitorojnë nga afër procesin zgjedhor në qendrat e votimit dhe në vendvotime dhe ky reduktim vjen për shkak të pandemisë.

Ndryshe, zgjedhjet e parakohshme parlamentare të 14 Shkurtit zhvillohen pas vendimit të Gjykatës Kushtetuese se qeveria e udhëhequr nga Avdullah Hoti është zgjedhur në mënyrë të paligjshme.

Në këto zgjedhje janë 143.006 votues më pak se në zgjedhjet parlamentare të 6 tetorit 2019, pasi nga kjo listë janë larguar 122.421 votues të cilët posedojnë vetëm dokumente të identifikimit të lëshuara nga UNMIK-u, si dhe për shkak të largimit të 11.086 personave që janë konfirmuar se janë larguar nga skema pensionale për shkak të vdekjes.